وزیر اعظم پاکستان کے اس وفد کی قیادت کر رہے ہیں جس میں نائب وزیر اعظم اور وزیر خارجہ سینیٹر محمد اسحاق ڈار، وزیر داخلہ سید محسن نقوی، وزیر اطلاعات عطا اللہ تارڑ، پاکستان پیپلز پارٹی (پی پی پی) کے چیئرمین بلاول بھٹو زرداری اور دیگر اعلیٰ سرکاری حکام شامل ہیں۔ اس موقع پر وزیر اعظم نے اسلام کے لیے مرحوم سپریم لیڈر کی لازوال خدمات کو یاد کیا اور انہیں زبردست خراجِ عقیدت پیش کرتے ہوئے کہا کہ انہوں نے کئی دہائیوں تک غیر معمولی حکمت اور بصیرت کے ساتھ ایرانی قوم کی رہنمائی کی۔

وزیر اعظم شہباز شریف نے اس قومی غم کی گھڑی میں صدر ڈاکٹر مسعود پزشکیان اور ایران کے برادر عوام کے ساتھ مکمل یکجہتی کا اظہار کیا اور مرحوم رہنما کی مغفرت کے لیے دعا کی۔

چیئرمین سینیٹ سید یوسف رضا گیلانی اور اسپیکر قومی اسمبلی سردار ایاز صادق کی قیادت میں پارلیمانی وفد، اراکینِ پارلیمنٹ اور وزیر اعلیٰ سندھ سید مراد علی شاہ نے بھی وزیر اعظم کے ہمراہ جنازے میں شرکت کی۔

وزیر اعظم تقریب میں شرکت کے بعد ترکیہ کے اپنے سرکاری دورے پر استنبول کے لیے روانہ ہو گئے۔ دفتر خارجہ کے مطابق وزیر اعظم شہباز شریف ترکیہ کے صدر رجب طیب اردوان کی دعوت پر یہ دورہ کر رہے ہیں۔ دونوں فریقین دوطرفہ تعلقات کے تمام پہلوؤں پر تفصیلی بات چیت کریں گے، جس میں دونوں برادر ممالک کے مابین باہمی تجارت اور سرمایہ کاری کے تعاون کو فروغ دینے پر خصوصی توجہ دی جائے گی۔ قیادت کی اس ملاقات میں علاقائی امن و سلامتی سے متعلق امور پر بھی غور کیا جائے گا۔

استنبول میں قیام کے دوران وزیر اعظم پاکستان کی جانب سے منعقدہ ایک بزنس کانفرنس سے بھی خطاب کریں گے، جس کا مقصد اسپیشل اکنامک زونز (ایس ای زیڈز)، توانائی، آئی ٹی اور نجکاری کے شعبوں سمیت ترجیحی شعبہ جات میں پاکستان کی تجارت اور سرمایہ کاری کی صلاحیتوں کو اجاگر کرنا ہے۔ اس کانفرنس میں ترکیہ کی معروف کاروباری شخصیات اور سرمایہ کاروں کے ساتھ ساتھ اعلیٰ سرکاری حکام اور دیگر معزز مہمان شرکت کریں گے۔