ریسکیو 1122 پنجاب کے ترجمان فاروق احمد نے بتایا کہ اموات اٹک میں ہوئیں، جہاں تیز ہواؤں اور تیز بارش کے دوران نیا پمپ کے قریب ایک دیوار گرنے سے دو افراد جاں بحق اور تین دیگر زخمی ہو گئے۔ اٹک ہی کے علاقے پارا شاہین باغ میں ایک الگ واقعے میں مکان کی چھت گرنے سے تین افراد زخمی ہوئے۔

خوشاب کے علاقے قائد آباد میں آسمانی بجلی گرنے سے ایک شخص زخمی ہوا، جبکہ سرگودھا میں تیز ہواؤں اور بارش کے باعث سائن بورڈ گرنے سے ایک اور شخص زخمی ہو گیا۔ ادھر شیخوپورہ میں چک رسالہ روڈ پر لکڑی کی چھت گرنے سے ایک شخص زخمی ہوا۔

اسی طرح پنجاب بھر میں مون سون سے پہلے کی بارشوں کا آغاز ہو چکا ہے اور مغربی ہواؤں کے سلسلے اور نمی کے باعث 6 جولائی تک وسیع پیمانے پر آندھی، تیز ہواؤں اور گرج چمک کے ساتھ بارشوں کا امکان ہے۔

حکام نے خبردار کیا ہے کہ گرج چمک کے ساتھ بارش کے دوران بڑے شہروں میں اربن فلڈنگ اور کھلے علاقوں میں آسمانی بجلی گرنے کا خطرہ ہے۔ پروونشل ڈیزاسٹر مینجمنٹ اتھارٹی (پی ڈی ایم اے) نے انتظامیہ کو ہائی الرٹ رہنے کی ہدایت کی ہے۔

پاکستان محکمہ موسمیات (پی ایم ڈی) کے مطابق یکم سے 6 جولائی تک اسلام آباد، راولپنڈی، مری، گوجرانوالہ، لاہور، سیالکوٹ اور فیصل آباد میں بارشوں کا امکان ہے۔ محکمہ موسمیات نے مزید بتایا کہ جنوبی اضلاع جیسے کہ ملتان، بہاولپور، ڈی جی خان اور راجن پور میں 3 سے 5 جولائی تک بارشیں ہوں گی۔