ایس ای سی پی کے مطابق، باقی ماندہ آئی پی او، ایل ایس ای اسپیک-II کی بک بلڈنگ کا مرحلہ آئندہ چند روز میں شروع ہونے والا ہے۔

ایس ای سی پی کا کہنا ہے کہ ان آئی پی اوز میں مینوفیکچرنگ، پیٹرولیم، ڈیری، اسلامی مالیات، پولٹری، رئیل اسٹیٹ اور ٹیکنالوجی کے شعبے شامل ہیں، جو خطے میں غیر یقینی صورتحال کے باوجود کیپٹل مارکیٹ میں وسیع بنیادوں پر سرگرمی کی عکاسی کرتے ہیں۔

سب سے بڑے آئی پی اوز میں سروس لانگ مارچ ٹائرز لمیٹڈ نے 7.77 ارب روپے حاصل کیے، جو نوری آباد میں مسافر گاڑیوں کے ٹائروں کی تیاری کا پلانٹ قائم کرنے پر خرچ کیے جائیں گے۔ اسی طرح ستارہ پیٹرولیم نے 4.83 ارب روپے اکٹھے کیے، جبکہ اس کا آئی پی او محض آٹھ منٹ میں مکمل طور پر سبسکرائب ہوگیا اور پیش کیے گئے حصص کے مقابلے میں سات گنا زیادہ طلب موصول ہوئی۔

غنی ڈیریز نے 3.44 ارب روپے حاصل کیے اور اس کے ساتھ ہی یہ پاکستان کی پہلی فہرست شدہ کارپوریٹ ڈیری فارم کمپنی بن گئی، جبکہ وحدت پولٹری نے توسیعی منصوبوں کے لیے تقریباً ایک ارب روپے کا سرمایہ حاصل کیا۔

ملک کی پہلی لسٹڈ نان لائف تکافل کمپنی، پاک قطر جنرل تکافل کو ادارہ جاتی سرمایہ کاروں کی جانب سے پیش کیے گئے حصص کے مقابلے میں 21 گنا زیادہ طلب موصول ہوئی، جبکہ 13 ہزار سے زائد ریٹیل سرمایہ کاروں نے بھی اس میں سرمایہ کاری کی۔

اس عرصے کے دوران سگنیچر ریزیڈنسی ریئٹ، جے ایس رینٹل ریئٹ، پاکستان کا پہلا ایل ایس ای اسپیک-I اور سلیکٹ ٹیکنالوجیز بھی اسٹاک ایکسچینج میں فہرست ہوئے، جبکہ ایل ایس ای اسپیک-II کو بھی ایس ای سی پی کی منظوری مل چکی ہے۔

ایس ای سی پی کے چیئرمین کبیر احمد سدھو نے کہا کہ ریگولیٹر لسٹنگ کے تقاضوں کو مزید آسان بنانے اور اسٹاک مارکیٹ میں سرمایہ کاری تک رسائی بہتر بنانے کے لیے اقدامات جاری رکھے گا، تاکہ سرمایہ کاروں کی شرکت میں اضافہ ہو اور کیپٹل مارکیٹ کی ترقی کو فروغ ملے۔