امریکا اور ایران کے درمیان ہفتے کے اختتام پر سخت بیانات کے تبادلے کے بعد دونوں ممالک نے جوابی حملے روکنے اور منگل کو قطر میں مذاکرات دوبارہ شروع کرنے پر اتفاق کیا، تاہم جنگ بندی کی نازک صورتحال کے باعث سرمایہ کار بدستور محتاط ہیں۔

آبنائے ہرمز میں حملوں کے باعث توانائی کی ترسیل ایک بار پھر متاثر ہونے سے عالمی منڈی میں خام تیل کی قیمتوں میں اضافہ ہوا، جس کے نتیجے میں محفوظ سرمایہ کاری سمجھے جانے والے امریکی ڈالر کی طلب میں بھی اضافہ دیکھنے میں آیا۔

یورو 1.1387 ڈالر پر تقریباً مستحکم رہا، تاہم یہ جون کے دوران 2.3 فیصد ماہانہ کمی کی جانب بڑھ رہا ہے۔ برطانوی پاؤنڈ 0.1 فیصد کمی کے ساتھ 1.3198 ڈالر پر ٹریڈ ہوا اور ماہانہ بنیاد پر تقریباً 2 فیصد نیچے رہا۔

آسٹریلوی ڈالر بھی 0.1 فیصد کمی کے ساتھ 0.6885 ڈالر پر آ گیا اور جون میں 4.1 فیصد خسارے کی جانب گامزن رہا، جبکہ نیوزی لینڈ ڈالر 0.5635 ڈالر پر تقریباً مستحکم رہتے ہوئے ماہانہ 5.9 فیصد کمی کی راہ پر ہے۔

جاپانی ین 161.75 فی ڈالر کی سطح پر ٹریڈ ہوا، جو تقریباً 40 سال کی کم ترین سطح کے قریب ہے۔

ڈالر انڈیکس، جو امریکی کرنسی کی قدر کو بڑی عالمی کرنسیوں کے مقابلے میں ظاہر کرتا ہے، 101.36 پر پہنچ گیا اور جون میں تقریباً 2.5 فیصد اضافے کی جانب بڑھ رہا ہے، جو گزشتہ سال جولائی کے بعد سب سے بڑی ماہانہ بڑھوتری ہوگی۔

تجزیہ کاروں کے مطابق ایران کے ساتھ کشیدگی نے مہنگائی کے خدشات میں اضافہ کیا ہے، جبکہ فیڈرل ریزرو کے نئے چیئرمین کیون وارش کے سخت مؤقف نے رواں سال شرح سود میں کمی کی توقعات کو کمزور کر دیا ہے۔

سرمایہ کار اب امریکا میں اس ہفتے جاری ہونے والی نان فارم پے رولز اور بے روزگاری کی شرح کے اعداد و شمار کے منتظر ہیں، جن سے امریکی معیشت اور فیڈرل ریزرو کی آئندہ مانیٹری پالیسی کے بارے میں اہم اشارے ملنے کی توقع ہے۔

ادھر یورپی مرکزی بینک کے سالانہ فورم پر بھی عالمی سرمایہ کاروں کی گہری نظر ہے، جہاں مرکزی بینکوں کی آئندہ پالیسیوں پر اہم اشارے سامنے آنے کا امکان ہے۔