لبنان کی قومی خبررساں ایجنسی کے مطابق اسرائیلی جنگی طیاروں اور ڈرونز نے جنوبی لبنان اور وادی بیکا میں متعدد مقامات کو نشانہ بنایا۔

اسرائیلی فوجی حکام کے ایک اہلکار نے بتایا کہ حزب اللہ نے رات کے دوران جنوبی لبنان میں اسرائیلی افواج پر 50 سے زائد پروجیکٹائل فائر کیے، جس کے بعد اسرائیل نے جوابی کارروائی کرتے ہوئے ان اہداف کو نشانہ بنایا جنہیں اس نے ”حزب اللہ کے ٹھکانے“ قرار دیا۔

اسرائیلی فوج، جو جنوبی لبنان کے وسیع علاقوں پر قابض ہے، نے ایک بیان میں کہا ہے کہ حزب اللہ کے حملے جنگ بندی معاہدے کی بار بار خلاف ورزی کے مترادف ہیں۔

فوج نے کہا ہے کہ وہ سیاسی ہدایات کے مطابق جنگ بندی کے لیے بدستور پرعزم ہے، تاہم کسی بھی ایسے حملے کا فیصلہ کن جواب دیا جائے گا جو اسرائیلی شہریوں یا فوجیوں کو نشانہ بنائے۔

حزب اللہ نے بھی کہا ہے کہ وہ جنگ بندی کا پابند ہے، تاہم کسی بھی ایسی کوشش کا جواب دے گا جس کا مقصد اسرائیل کی جانب سے ”لبنانی علاقوں پر قبضے کو برقرار رکھنا یا اس میں توسیع کرنا“ ہو۔

حزب اللہ نے دعویٰ کیا ہے کہ اسرائیلی فورسز نے رات کے وقت جنوبی لبنان میں علی الطاہر پہاڑی علاقے میں دراندازی کی کوشش کی، جس پر اس کے جنگجوؤں نے مزاحمت کی، جس کے بعد اسرائیل نے اپنے بیان کردہ آپریشنل علاقے کے اندر اور باہر فضائی حملے کیے۔

حزب اللہ کے ایک سینیئر عہدیدار نے کہا ہے کہ وہ اسرائیل کو مقبوضہ لبنانی علاقوں میں ”آزادانہ نقل و حرکت“ کی اجازت نہیں دے گا، اور جب تک اسرائیلی افواج لبنان میں موجود ہیں مزاحمت کو جائز قرار دیا۔

یہ حملے اس نازک جنگ بندی کی کمزوری کو اجاگر کرتے ہیں جس کا مقصد مہینوں سے جاری بڑھتی ہوئی کشیدگی کو روکنا تھا، اور اس عارضی امن سمجھوتے کی شکنندگی بھی سامنے آتی ہے جو امریکہ اور ایران کے درمیان طے پایا تھا اور جس کا ایک پہلو لبنان میں لڑائی کے خاتمے سے مشروط ہے۔

مہلک حملے

ایک مقامی عہدیدار کے مطابق سب سے ہلاکت خیز حملوں میں سے ایک جنوبی قصبے باریش (ضلع صور) میں ایک تین منزلہ رہائشی عمارت پر کیا گیا، جس میں ایک ہی خاندان کے چار افراد بشمول والد، والدہ اور دو بچے، جاں بحق ہو گئے۔

لبنانی فوج نے کہا ہے کہ ایک اسرائیلی حملے میں کفررومن نبطیہ روڈ پر ایک فوجی اہلکار بھی جاں بحق ہوا۔

اسرائیل کے عربی زبان کے فوجی ترجمان نے کہا کہ اگر حزب اللہ ”دشمنانہ سرگرمیوں اور معاہدوں کی خلاف ورزیوں“ کو روک دے تو امن ممکن ہو سکتا ہے۔

انہوں نے کہا کہ سیکیورٹی زون میں اسرائیلی موجودگی کا مقصد خطرات کا خاتمہ اور حزب اللہ کے ڈھانچے کو ختم کرنا ہے، نہ کہ عام شہریوں کو نقصان پہنچانا۔

امریکی عہدیدار کے مطابق جنگ بندی جمعہ کی شام 4 بجے (1300 جی ایم ٹی) سے نافذ العمل ہوئی، جبکہ ایک سینئر اسرائیلی اہلکار اور حزب اللہ کے دو ذرائع نے بھی اس معاہدے کی تصدیق کی۔

لبنان کی وزارتِ صحت کے مطابق 2 مارچ سے اب تک اسرائیلی حملوں میں 3,912 افراد جاں بحق ہو چکے ہیں، جن میں طبی عملہ، خواتین اور بچے شامل ہیں۔ اسرائیلی حکام کے مطابق کم از کم 32 فوجی اور چار شہری ہلاک ہوئے ہیں۔

امریکہ اور ایران کے درمیان اس ہفتے ہونے والی مفاہمت میں مختلف محاذوں پر فوری اور مستقل فوجی کارروائیوں کے خاتمے کی بات کی گئی ہے، جن میں لبنان بھی شامل ہے۔

اسرائیل، جو ان مذاکرات کا حصہ نہیں تھا، نے ان شقوں کی مخالفت کی ہے جن کے بارے میں اس کا کہنا ہے کہ وہ لبنان میں اپنی عسکری کارروائی کو محدود کر سکتی ہیں۔