ایک روز قبل انسدادِ دہشت گردی عدالت (اے ٹی سی) نے پولیس گاڑیوں کو نذرِ آتش کرنے کے کیس میں اپنا فیصلہ محفوظ کر لیا تھا۔ اس مقدمے میں استغاثہ اور دفاع دونوں فریقین اپنے دلائل مکمل کر چکے تھے جبکہ 37 گواہانِ استغاثہ اپنے بیانات ریکارڈ کرا چکے تھے۔

اے ٹی سی کے جج منظور علی گل نے محفوظ فیصلہ کوٹ لکھپت جیل میں سناتے ہوئے پی ٹی آئی رہنماؤں مخدوم محمود الرشید، ڈاکٹر یاسمین راشد، اعجاز چوہدری اور عمر سرفراز چیمہ کو 9 مئی کے واقعات کے دوران مغلپورہ میں پولیس گاڑیوں کو نذرِ آتش کرنے کے مقدمے میں 10، 10 سال قید کی سزا سنائی۔

سابق وزیر خارجہ اور سینئر پی ٹی آئی رہنما شاہ محمود قریشی کو اسی مقدمے میں بری کر دیا گیا۔

استغاثہ کے مطابق مجموعی طور پر 22 ملزمان کے خلاف چالان عدالت میں پیش کیا گیا تھا جبکہ ٹرائل کے دوران 37 گواہانِ استغاثہ کے بیانات ریکارڈ اور جرح کی گئی۔

عدالتی کارروائی کے دوران دو ملزمان کو اشتہاری قرار دیا گیا۔ عدالت نے مفرور ملزمان ارباز زمان اور الٰہی بخش کے خلاف قانونی کارروائی جاری رکھنے کا حکم دیا۔

مجموعی طور پر انسدادِ دہشت گردی عدالت نے 15 ملزمان کے حوالے سے اپنا فیصلہ سنایا جبکہ دیگر متعلقہ مقدمات میں قانونی کارروائی قانون کے مطابق جاری رہے گی۔

9 مئی 2023 کو پنجاب بھر میں ہونے والے پرتشدد واقعات کے دوران مغلپورہ میں پولیس گاڑیوں کو نذرِ آتش کرنے سمیت توڑ پھوڑ اور آتش زنی کے واقعات پیش آئے تھے۔ ان وسیع پیمانے پر ہونے والے فسادات کے بعد وزیراعظم شہباز شریف نے 13 مئی 2024 کو ان واقعات میں ملوث تمام افراد کی گرفتاری کے لیے 72 گھنٹوں کی ڈیڈلائن دی تھی۔