حکومت نے پٹرول 74.28 روپے فی لٹر اور ڈیزل 67.31 روپے فی لٹر سستا کردیا جسے عالمی منڈی میں تیل قیمتوں میں کمی کا فائدہ عوام تک منتقل کرنے کا اقدام قرار دیا گیا ہے۔

پٹرولیم ڈویژن کی جانب سے جاری کردہ نوٹیفکیشن کے مطابق 74.28 روپے کی تاریخی کمی کے بعد پٹرول کی نئی قیمت 299.50 روپے فی لٹر ہوگئی، اسی طرح 67.31 روپے کی بڑی کمی سے ڈیزل کی نئی قیمت 311.47 روپے فی لٹر مقرر کی گئی۔

وزیراعظم آفس کے مطابق وزیراعظم شہباز شریف نے کہا کہ ہم خطے میں بہتر ہوتی معاشی صورتحال اور عالمی منڈی میں تیل کی قیمتوں میں کمی کے فوائد فوری طور پر عوام تک منتقل کررہے ہیں۔

شہبازشریف نے کہا کہ کفایت شعاری کے اقدامات کے تحت وفاقی حکومت نے 129 ارب روپے استعمال کرتے ہوئے عوام کو مہنگے ایندھن کے اثرات سے محفوظ رکھنے کی کوشش کی۔

انہوں نے کہا کہ ملک بھر میں پٹرولیم مصنوعات کی فراہمی میں کوئی کمی نہیں آئی، نہ ہی کہیں قلت یا لمبی قطاریں دیکھنے میں آئیں۔

وزیراعظم کے مطابق حکومت معاشی استحکام برقرار رکھنے اور مہنگائی میں مزید کمی کے لیے مؤثر اقدامات جاری رکھے گی۔