برطانوی حکومت کے مطابق معاہدوں کی تفصیلات میں شامل ہے کہ جاپان پانچ سال کے دوران انفراسٹرکچر اور مالیاتی خدمات کے شعبوں میں 9 ارب پاؤنڈ سے زائد سرمایہ کاری کرے گا، جبکہ برطانیہ میں آف شور ونڈ منصوبوں کے لیے بھی 9 ارب پاؤنڈ تک سرمایہ کاری کھولنے کا منصوبہ ہے۔

آف شور ونڈ منصوبوں سے اسکاٹ لینڈ اور سیلٹک سی میں 5.9 گیگا واٹ پیداواری صلاحیت حاصل ہونے کی توقع ہے، جو توانائی کے شعبے میں نمایاں اضافہ ہوگا۔

دونوں ممالک کے درمیان مصنوعی ذہانت (اے آئی)، سیمی کنڈکٹرز اور کوانٹم کمپیوٹنگ جیسے جدید شعبوں میں نئی ٹیکنالوجی پارٹنرشپ بھی شروع کی جائے گی۔

اس کے علاوہ ہٹاچی انرجی، رولز رائس اور ایسائی جیسی بڑی کمپنیوں کی جانب سے بھی سرمایہ کاری اور تعاون کے اعلانات متوقع ہیں، جو پاور گرڈ کی توسیع، جوہری ٹیکنالوجی اور لائف سائنسز کے شعبوں پر مشتمل ہوں گے۔

دیگر کاروباری اور حکومتی معاہدوں پر بھی دستخط متوقع ہیں، جو جاپانی وزیراعظم کے دورے کے دوران ہوں گے۔ یہ دورہ 15 سے 17 جون کو فرانس میں ہونے والے جی7 سربراہی اجلاس سے قبل ہو رہا ہے۔