بدھ کے روز اسپاٹ گولڈ کی قیمت 1.8 فیصد کمی کے ساتھ 4,187.59 ڈالر فی اونس تک گر گئی، جو 23 مارچ کے بعد اس کی کم ترین سطح ہے۔ اسی طرح اگست میں فراہمی کے لیے امریکی گولڈ فیوچرز 1.7 فیصد کمی کے ساتھ 4,213.40 ڈالر فی اونس پر آ گئے۔

مارکیٹ ماہرین کے مطابق امریکی ڈالر کی مضبوطی نے سونے پر دباؤ بڑھا دیا ہے کیونکہ ڈالر میں قیمت طے ہونے والا سونا دیگر کرنسیوں کے حامل سرمایہ کاروں کے لیے مہنگا ہو جاتا ہے۔ دوسری جانب خام تیل کی قیمتوں میں تقریباً ایک فیصد اضافے نے افراطِ زر کے خدشات کو بڑھا دیا ہے، جس سے یہ توقعات مضبوط ہوئی ہیں کہ امریکی فیڈرل ریزرو شرح سود کو طویل عرصے تک بلند رکھ سکتا ہے یا مزید اضافہ کر سکتا ہے۔

تجزیہ کار الیا اسپیواک کے مطابق سونے کی قیمتوں میں کمی کی بنیادی وجہ فیڈرل ریزرو کی پالیسی سے متعلق توقعات، بانڈز کی بڑھتی ہوئی ییلڈز اور مضبوط ڈالر ہیں۔ ان کا کہنا تھا کہ اگر سونا 4,100 ڈالر کی سطح سے نیچے آ گیا تو سال کے اختتام تک 3,500 ڈالر فی اونس کی سطح بھی زیر غور آ سکتی ہے۔

منگل کو امریکا نے ایران پر حملے کیے تھے، جس کے بعد دونوں ممالک کے درمیان امن معاہدے کے امکانات مزید کمزور ہو گئے ہیں۔ اس صورتحال نے سرمایہ کاروں کی توجہ امریکی مہنگائی کے اعدادوشمار کی جانب مبذول کر دی ہے، جن میں مئی کا کنزیومر پرائس انڈیکس (سی پی آئی) اور جمعرات کو جاری ہونے والا پروڈیوسر پرائس انڈیکس (پی پی آئی) شامل ہیں۔

دیگر قیمتی دھاتوں میں بھی کمی دیکھی گئی۔ چاندی 1.5 فیصد گر کر 64.43 ڈالر فی اونس، پلاٹینم 2.8 فیصد کمی کے ساتھ 1,678.10 ڈالر اور پیلیڈیم 0.8 فیصد گر کر 1,212.31 ڈالر فی اونس پر آ گیا۔