انٹر سروسز پبلک ریلیشنز (آئی ایس پی آر) کے مطابق ملاقات میں باہمی دلچسپی کے امور، خطے کی سیکیورٹی صورتحال اور پاکستان و بحرین کے درمیان دفاعی و سلامتی تعاون کو مزید مضبوط بنانے کے امکانات پر تفصیلی تبادلۂ خیال کیا گیا۔

دونوں معزز شخصیات نے دونوں ممالک کے درمیان دیرینہ اور برادرانہ تعلقات پر اطمینان کا اظہار کیا اور عسکری سطح پر تعاون کو مزید وسعت دینے کی اہمیت پر زور دیا۔

بحرینی کمانڈر نے اپنے دورے کے دوران چیف آف دی نیول اسٹاف ایڈمرل نوید اشرف اور چیف آف دی ایئر اسٹاف ائیر چیف مارشل ظہیر احمد بابر سدھو سے بھی الگ الگ ملاقاتیں کیں۔

نیول ہیڈکوارٹرز میں ہونے والی ملاقات میں دوطرفہ دفاعی تعاون اور خطے میں بحری سلامتی کے امور زیرِ بحث آئے۔ بحرینی کمانڈر نے پاکستان نیوی کے کردار کو سراہتے ہوئے اسے خطے میں بحری تعاون اور استحکام کے لیے ایک اہم قوت قرار دیا۔

ائیر ہیڈکوارٹرز میں ائیر چیف مارشل ظہیر احمد بابر سدھو نے معزز مہمان کو پاک فضائیہ کی جاری جدید کاری کے عمل پر تفصیلی بریفنگ دی، جس میں صلاحیتوں میں اضافہ، انفراسٹرکچر کی ترقی، مقامی سطح پر دفاعی پیداوار کے اقدامات اور جدید تربیتی اصلاحات شامل تھیں۔

دونوں فریقوں نے ابھرتی ہوئی دفاعی ٹیکنالوجیز پر بھی تبادلۂ خیال کیا، جن میں ڈرونز، مصنوعی ذہانت، خودکار نظام، جدید سینسرز اور ڈیجیٹل جدت شامل ہیں، ساتھ ہی فضائی دفاعی چیلنجز اور مربوط دفاعی ڈھانچوں پر بھی گفتگو ہوئی۔

شیخ محمد بن عیسیٰ بن سلمان آل خلیفہ نے پاکستان کی مسلح افواج کی پیشہ ورانہ صلاحیت اور آپریشنل تیاری کو سراہا اور خطے میں امن و استحکام کے لیے ان کے کردار کو تسلیم کیا۔

انہوں نے پاکستان کی مقامی دفاعی صلاحیتوں اور جدید کاری کی کوششوں کو بھی سراہتے ہوئے تربیت، نئی ٹیکنالوجیز اور استعداد کار بڑھانے کے شعبوں میں تعاون بڑھانے میں دلچسپی ظاہر کی۔

آئی ایس پی آر کے مطابق یہ دورہ پاکستان اور بحرین کے مضبوط اور دیرپا دفاعی تعلقات کی عکاسی کرتا ہے اور اس سے دونوں ممالک کے درمیان عسکری تعاون کو مزید فروغ ملنے کی توقع ہے۔