اس پیشرفت کا انکشاف منگل کو وزیراعظم شہباز شریف کی زیرِ صدارت بجلی تقسیم کار کمپنیوں (ڈسکوز) کی نجکاری سے متعلق ایک جائزہ اجلاس کے دوران کیا گیا۔

سرکاری اعلامیے کے مطابق وزیراعظم نے کہا کہ خسارے کے شکار ریاستی ملکیتی اداروں کی نجکاری ہماری ترجیح ہے۔

وزیراعظم نے حکام کو ڈسکوز کی نجکاری کے عمل کو تیز کرنے کی ہدایت کی۔ انہوں نے کہا کہ نجکاری کا پورا عمل مکمل شفافیت کے ساتھ پایہِ تکمیل تک پہنچایا جائے۔

انہوں نے ہدایت کی کہ ڈسکوز کی نجکاری کے بعد مضبوط ریگولیٹری فریم ورک بنایا جائے۔

اجلاس کو ڈسکوز کی نجکاری کے حوالےسے سے پیشرفت پر بریفنگ میں بتایا گیا کہ پہلے فیز میں اسلام آباد الیکٹرک سپلائی کمپنی، گوجرانوالا الیکٹرک پاور کمپنی اور فیصل آباد الیکٹرک سپلائی کمپنی کی نجکاری کی جائے گی۔

اجلاس کو بتایا گیا کہ ان تین ڈسکوز کی نجکاری کے حوالےسے ایکسپریشن آف انٹرسٹ ملکی و بین الاقوامی اخبارات میں دیا جا چکا ہے ۔

اجلاس کو آگاہ کیا گیا کہ کابینہ کی نجکاری کمیٹی نے ان تین ڈسکوز کی نجکاری کے حوالےسے ٹرانزیکشن اسٹرکچر کی منظوری دے دی ہے

اجلاس کے شرکاء کو بتایا گیا کہ سرمایہ کاروں کو راغب کرنے کے لئے روڈ شو اس ماہ سے منعقد کئے جا رہے ہیں ۔ سعودی عرب ، ترکیہ اور چین کے سرمایہ کاروں کے لئے بین الاقوامی سطح پر بھی روڈ شوز منعقد ہوں گے۔

اجلاس میں نائب وزیراعظم و وزیر خارجہ اسحاق ڈار ، وفاقی وزراء اعظم نذیر احمد ، احد خان چیمہ ، محمد اورنگزیب ، سردار اویس لغاری ، مشیر وزیر اعظم برائے نجکاری محمد علی، وزیر مملکت برائے خزانہ و ریلوے بلال اظہر کیانی اور متعلقہ اعلیٰ سرکاری افسران نے شرکت کی۔