کرنسی مارکیٹ میں اتار چڑھاؤ مجموعی مارکیٹ کے مقابلے میں محدود رہا جہاں ٹیکنالوجی شیئرز میں شدید فروخت کے باعث ایشیائی مارکیٹیں دباؤ کا شکار رہیں۔ دوسری جانب ڈالر نے اپنی مضبوط برتری برقرار رکھی جو اس رپورٹ کے بعد سامنے آئی جس میں بتایا گیا کہ گزشتہ ماہ نان فارم پے رولز میں ایک لاکھ 72 ہزار ملازمتوں کا اضافہ ہوا جو اندازوں سے کہیں زیادہ تھا۔

ڈالر کے مقابلے میں یورو گر کر دو ماہ کی کم ترین سطح 1.1507 ڈالر پر آگیا جب کہ برطانوی پاؤنڈ بھی دباؤ کا شکار ہو کر تین ہفتوں کی نچلی ترین سطح 1.33165 ڈالر پر بند ہوا۔

آسٹریلین اور نیوزی لینڈ ڈالرز بھی اسی طرح گراوٹ کا شکار ہو کر بالترتیب 0.7016 اور 0.5779 پر دو ماہ کی کم ترین سطح پر آ گئے۔

کیپٹل اکانومکس کے چیف مارکیٹس اکانومسٹ جوناس گولٹرمین نے کہا کہ امریکہ کی پے رولز رپورٹ توانائی کی قیمتوں کے جاری بحران کے باوجود ایک مستحکم ہوتی ہوئی امریکی لیبر مارکیٹ کی تصویر پیش کرتی ہے۔

اس صورتِ حال کی وجہ سے رواں سال کے آخر میں فیڈرل ریزرو کی جانب سے پالیسی کو سخت کرنے کا امکان بڑھتا جا رہا ہے، توانائی کی فراہمی کے بحران اور امریکی لیبر مارکیٹ کی تیز رفتاری کے پیشِ نظر اب ہم توقع کرتے ہیں کہ ایف او ایم سی رواں سال کے آخر میں شرحِ سود میں 25, 25 بیسس پوائنٹس کے دو اضافے کرے گا۔

روزگار کی رپورٹ جاری ہونے سے پہلے ہی تاجر رواں سال فیڈرل ریزرو کی جانب سے شرحِ سود میں اضافے پر آہستہ آہستہ اپنے داؤ بڑھا رہے تھے کیونکہ ایران جنگ سے جڑا عالمی توانائی کا بحران افراطِ زر کو مزید ہوا دینے کا خطرہ پیدا کررہا ہے۔

اسرائیل نے کہا ہے کہ اس نے پیر کو مغربی اور وسطی ایران میں فوجی اہداف کو نشانہ بنایا ہے جبکہ رپورٹس کے مطابق امریکی صدر ڈونلڈ ٹرمپ نے اسرائیلی وزیرِ اعظم بنجمن نیتن یاہو کو مزید حملوں سے باز رہنے کی تاکید کی تھی۔

سی ایم ای فیڈ واچ ٹول کے مطابق مارکیٹ اب دسمبر میں فیڈرل ریزرو کی جانب سے شرحِ سود میں اضافے کے 70 فیصد سے زائد امکانات کو تسلیم کر رہی ہے جو کہ ایک ہفتہ قبل محض 45 فیصد تھے۔

ڈالر کی اس مضبوطی نے بدلے میں (جاپانی) ین کے لیے مزید مشکلات کھڑی کر دی ہیں جو گر کر 160.34 فی ڈالر کی سطح پر آگیا ہے۔

جاپانی کرنسی نے اب وہ تمام فائدے گنوا دیے ہیں جو اس نے محض ایک ماہ قبل ٹوکیو کی جانب سے 11.7 ٹریلین ین (73.01 ارب ڈالر) کی مارکیٹ مداخلت کے بعد حاصل کیے تھے جب یہ گر کر جولائی 2024 کے بعد کی اپنی کم ترین سطح 160.725 پر آگئی تھی۔