عرفات منہاس نے 32 رنز کے عوض پانچ وکٹیں حاصل کیں اور ان کی عمدہ بولنگ کی بدولت آسٹریلیا کی نسبتاً کمزور ٹیم 44.1 اوورز میں 200 رنز پر آؤٹ ہوگئی۔ پاکستان نے یہ ہدف 42.3 اوورز میں پانچ وکٹوں کے نقصان پر حاصل کر کے اپنا ایک ہزارواں ون ڈے یادگار فتح کے ساتھ جیت لیا۔

بابر اعظم نے 94 گیندوں پر 69 رنز کی ذمہ دارانہ اننگز کھیلی، جبکہ غازی غوری نے 92 گیندوں پر 65 رنز بنا کر عمدہ ساتھ دیا۔ خشک اور اسپنرز کے لیے سازگار پنڈی اسٹیڈیم کی وکٹ پر آسٹریلیا کے ناتجربہ کار اسپنرز پاکستانی سست رفتار بولرز کا مقابلہ نہ کر سکے۔

پاکستان کی دو وکٹیں 49 رنز پر گر گئی تھیں جب صاحبزادہ فرحان 28 اور معاذ صداقت آٹھ رنز بنا کر آؤٹ ہوئے، تاہم بابر اعظم اور غازی غوری نے تیسری وکٹ کے لیے 127 رنز کی شاندار شراکت قائم کر کے میچ میں پاکستان کی پوزیشن مستحکم کر دی۔

بابر اعظم کی اننگز میں چار چوکے اور ایک چھکا شامل تھا، جبکہ غازی غوری نے آٹھ چوکے لگائے۔ دونوں بلے باز ناتھن ایلس کا شکار بنے، لیکن اس وقت پاکستان کو جیت کے لیے صرف 16 رنز درکار تھے، اس لیے ان کی وکٹوں سے میزبان ٹیم کی پوزیشن متاثر نہ ہوئی۔

عرفات منہاس نے چھکا لگا کر پاکستان کو فتح سے ہمکنار کیا۔

آسٹریلیا اس سیریز میں اپنے کئی اہم کھلاڑیوں کی خدمات سے محروم ہے، جن میں باقاعدہ کپتان پیٹ کمنز، مچل اسٹارک، جوش ہیزل ووڈ اور اوپنر ٹریوس ہیڈ شامل ہیں۔

ٹاس جیتنے کے بعد پاکستان نے آسٹریلیا کو بیٹنگ کی دعوت دی۔ مہمان ٹیم کی جانب سے میتھیو رینشا نے 63 گیندوں پر 61 رنز کی اننگز کھیل کر اپنے ون ڈے کیریئر کا بہترین اسکور بنایا، جبکہ اوپنر میتھیو شارٹ نے 76 گیندوں پر 55 رنز بنائے۔ تاہم پاکستانی اسپنرز کے سامنے آسٹریلوی بیٹنگ لائن زیادہ دیر نہ ٹھہر سکی اور مجموعی طور پر آٹھ وکٹیں اسپنرز کے حصے میں آئیں۔

ابرار احمد نے 44 رنز دے کر دو وکٹیں حاصل کیں اور 34 رنز کی ابتدائی شراکت کا خاتمہ کرتے ہوئے الیکس کیری کو 19 رنز پر آؤٹ کیا۔ اس کے بعد عرفات منہاس نے اپنی ذہانت اور درست لائن و لینتھ سے آسٹریلوی بیٹنگ کو تہس نہس کر دیا۔

عرفات نے اپنے چوتھے اوور میں قائم مقام کپتان جوش انگلس (13) اور مارنس لبوشین کو کھاتہ کھولنے کا موقع دیے بغیر پویلین بھیجا، جبکہ اگلے اوور میں کیمرون گرین کو پہلی ہی گیند پر آؤٹ کر کے آسٹریلیا کی مشکلات میں مزید اضافہ کر دیا۔

68 رنز پر چار وکٹیں گرنے کے بعد آسٹریلیا دباؤ میں آ گیا تھا، تاہم میتھیو شارٹ اور میتھیو رینشا نے پانچویں وکٹ کے لیے 55 رنز جوڑ کر مزاحمت کی۔ یہ شراکت بھی عرفات منہاس نے توڑی، جب انہوں نے شارٹ کو اسٹمپ آؤٹ کرا دیا۔

ابرار احمد نے اپنے دوسرے اسپیل میں رینشا کی وکٹ حاصل کی، جبکہ عرفات منہاس نے ناتھن ایلس کو آؤٹ کر کے اپنی پانچ وکٹیں مکمل کیں۔

میتھیو شارٹ نے اپنی چوتھی ون ڈے نصف سنچری کے دوران چھ چوکے لگائے، جبکہ رینشا کی اننگز میں پانچ چوکے اور ایک چھکا شامل تھا۔

سیریز کے باقی دو میچ منگل اور جمعرات کو لاہور میں کھیلے جائیں گے۔