مقامی حکام کے مطابق دھماکہ ریلوے ٹریک کے قریب اس وقت ہوا جب وہاں سے گزرنے والی ایک ٹرین کو نشانہ بنایا گیا، جس کے نتیجے میں ٹرین کی کئی بوگیاں پٹری سے اتر گئیں۔ پولیس حکام کا کہنا ہے کہ ابتدائی تحقیقات سے پتہ چلتا ہے کہ یہ ایک خودکش حملہ تھا۔ دھماکہ اس قدر شدید تھا کہ اس کی آواز دور دور تک سنی گئی اور ریلوے ٹریک کے قریب کھڑی متعدد گاڑیوں کو بھی شدید نقصان پہنچا۔

واقعے کے فوراً بعد سیکیورٹی فورسز اور ریسکیو ٹیمیں جائے وقوعہ پر پہنچ گئیں، قانون نافذ کرنے والے اداروں نے علاقے کو گھیرے میں لے کر سرچ آپریشن شروع کر دیا۔ حکام نے بتایا کہ دھماکے کے فوراً بعد فائرنگ کی آوازیں بھی سنی گئیں جس سے مقامی لوگوں اور امدادی کارکنوں میں خوف و ہراس پھیل گیا، تاہم سیکیورٹی اہلکاروں نے پوزیشنز سنبھال کر علاقے کو محفوظ بنا لیا۔

ریسکیو ذرائع نے 16 ہلاکتوں کی تصدیق کرتے ہوئے بتایا کہ 30 زخمیوں میں سے کئی کی حالت تشویشناک ہے، جس کے باعث ہلاکتوں میں مزید اضافے کا خدشہ ہے۔ لاشوں اور زخمیوں کو قریبی اسپتالوں بشمول سول اسپتال کوئٹہ منتقل کر دیا گیا ہے، جہاں ایمرجنسی نافذ کر دی گئی ہے۔ ابھی تک کسی گروپ نے اس حملے کی ذمہ داری قبول نہیں کی ہے۔

وزیر اعظم پاکستان شہباز شریف نے کوئٹہ کے چمن پھاٹک کے قریب ہونے والے اس ہولناک بم دھماکے کی شدید الفاظ میں مذمت کی ہے۔ سوشل میڈیا پلیٹ فارم ’ایکس‘ پر اپنے ایک بیان میں وزیر اعظم نے قیمتی انسانی جانوں کے ضیاع پر گہرے دکھ کا اظہار کیا ہے۔

وفاقی وزیر برائے ریلوے حنیف عباسی نے بھی حملے کی مذمت کرتے ہوئے کہا کہ دہشت گردی کی ایسی بزدلانہ کارروائیاں ہمارے قومی عزم کو کمزور نہیں کر سکتیں۔ انہوں نے کہا کہ بھارت اور افغانستان سے کام کرنے والے دہشت گرد نیٹ ورکس اور ان کی پشت پناہی کرنے والے عناصر کو کبھی کامیاب نہیں ہونے دیا جائے گا۔ ہمارے لوگوں پر حملہ کرنے والوں کو عبرتناک انجام تک پہنچایا جائے گا۔ انہوں نے واضح کیا کہ پاکستان ریلوے کا آپریشن بغیر کسی تعطل کے جاری رہے گا اور انہوں نے انتظامیہ کو واقعے کی فوری رپورٹ پیش کرنے کی ہدایت کی ہے۔