اسٹیٹ بینک کے مطابق کاروبار کے اختتام پر ڈالر کے مقابلے میں روپیہ تین پیسے کی معمولی بہتری سے 278.57 روپے پر بند ہوا۔

یاد رہے کہ پیر کو مقامی کرنسی 278.60 روپے پر بند ہوئی تھی۔

امریکی صدر ڈونلڈ ٹرمپ کی جانب سے ایران پر حملے کی معطلی اور مذاکرات کو موقع دینے کے بیان کے بعد عالمی منڈیوں میں اہم تبدیلیاں دیکھی گئیں۔ اس اعلان سے مشرقِ وسطیٰ میں کشیدگی کے خدشات کم ہوئے، جس کے باعث عالمی مارکیٹ میں برینٹ خام تیل کی قیمت 1 فیصد سے زائد کمی کے ساتھ 110.83 ڈالر فی بیرل پر آ گئی۔ جنگ کا خطرہ ٹلنے سے چھ بڑی کرنسیوں کے مقابلے میں ڈالر انڈیکس 99.026 پر مستحکم رہا، جبکہ امریکی ٹریژری بانڈز کی شرحِ منافع بھی کم ہو کر 4.591 فیصد پر آ گئی۔ مارکیٹ ماہرین کے مطابق امریکی مرکزی بینک کی جانب سے دسمبر میں شرحِ سود میں اضافے کا امکان اب 36.2 فیصد ہو گیا ہے۔

اس دوران مقامی مارکیٹ میں روپیہ ڈالر کے مقابلے میں مستحکم رہا۔ انٹر بینک مارکیٹ میں ڈالر کی قیمتِ خرید 278.57 روپے اور قیمتِ فروخت 278.77 روپے ریکارڈ کی گئی۔ دوسری جانب اوپن مارکیٹ میں ڈالر خرید کے لیے 7 پیسے اور فروخت کے لیے 9 پیسے مہنگا ہو کر بالترتیب 278.93 اور 279.65 روپے پر بند ہوا۔ دیگر کرنسیوں میں یورو 326.96 روپے، یو اے ای درہم 76.69 روپے اور سعودی ریال 74.91 روپے پر فروخت ہوا۔