ایک مشترکہ بیان میں پاکستان، ترکیہ، بنگلہ دیش، برازیل، کولمبیا، انڈونیشیا، اردن، لیبیا، مالدیپ اور اسپین کے وزرائے خارجہ نے بین الاقوامی پانیوں میں گزشتہ فلوٹیلاز کے خلاف اسرائیلی مداخلت پر گہری تشویش کا اظہار کیا ہے۔ انہوں نے سویلین بحری جہازوں اور انسانی ہمدردی کے لیے کام کرنے والے کارکنوں کو نشانہ بنانے والے اقدامات کے تسلسل کی مذمت کی۔

وزرائے خارجہ نے کہا کہ اس طرح کے حملے بشمول بحری جہازوں پر حملے اور کارکنوں کی من مانی حراست، بین الاقوامی قانون اور بین الاقوامی انسانی قانون کی کھلی خلاف ورزی ہیں۔

وزرائے خارجہ نے فلوٹیلا کے سویلین شرکاء کی حفاظت اور سلامتی کے حوالے سے شدید تشویش کا اظہار کیا اور زیر حراست تمام کارکنوں کی فوری رہائی کے ساتھ ساتھ ان کے حقوق اور وقار کے مکمل احترام کا مطالبہ کیا۔ انہوں نے اس بات پر زور دیا کہ پرامن انسانی اقدامات پر بار بار ہونے والے حملے بین الاقوامی قانون اور جہاز رانی کی آزادی کی مسلسل پامالی کی عکاسی کرتے ہیں۔

انہوں نے عالمی برادری سے مطالبہ کیا کہ وہ اپنی قانونی اور اخلاقی ذمہ داریاں پوری کرے، شہریوں اور انسانی ہمدردی کے مشنوں کے تحفظ کو یقینی بنائے اور سزا کے خوف سے آزادی کے خاتمے اور ان خلاف ورزیوں کے لیے جوابدہی کو یقینی بنانے کے لیے ٹھوس اقدامات کرے۔