تفصیلات کے مطابق اسٹاک مارکیٹ میں بینچ مارک انڈیکس کا آغاز دن کی بلند ترین سطح 164,939.08 پوائنٹس کے قریب ہوا لیکن کاروبار شروع ہوتے ہی اس میں گراوٹ کا سلسلہ شروع ہوگیا۔

دوپہر کے وقت مارکیٹ میں کچھ دیر کے لیے استحکام دیکھا گیا جس سے یہ ظاہر ہوتا ہے کہ سرمایہ کاروں نے عارضی طور پر سستے شیئرز خریدنے میں دلچسپی لی یا مارکیٹ میں اتار چڑھاؤ کچھ کم ہوا تھا۔ تاہم کاروبار کے آخری سیشن میں فروخت کا سلسلہ دوبارہ شروع ہو گیا جس نے انڈیکس کو دن کی کم ترین سطح 161,613.51 پوائنٹس پر دھکیل دیا۔

کاروبار کے اختتام پر کے ایس ای 100 انڈیکس 3,791.05 پوائنٹس یا 2.29 فیصد کی کمی سے 161,805.02 پوائنٹس پر بند ہوا۔

دبئی کے براکہ نیوکلیئر پاور پلانٹ پر ڈرون حملے کے بعد عالمی مارکیٹ میں خام تیل کی قیمتیں 110 ڈالر فی بیرل سے تجاوز کرگئی ہیں۔

پیر کو بہتری کیپیٹل نے اپنے ایک بیان میں کہا کہ متحدہ عرب امارات (یو اے ای) نے اسے ایک خطرناک حد تک کشیدگی میں اضافہ قرار دیا اور مارکیٹ میں وار پریمیم کی اچانک واپسی پاکستان جیسی توانائی درآمد کرنے والی مارکیٹوں کو شدید متاثر کر رہی ہے۔

گزشتہ ہفتے مشرقِ وسطیٰ میں مسلسل جیو پولیٹیکل کشیدگی اور غیر یقینی صورتحال کے باعث سرمایہ کاروں کے تحفظات برقرار رہے جس کی وجہ سے ملکی سطح پر بہتر ہوتے ہوئے میکرو اکنامک اشاریوں کے باوجود پاکستان اسٹاک مارکیٹ دباؤ کا شکار رہی۔ اس دوران بینچ مارک 100 انڈیکس 3.2 فیصد یا 5,519.75 پوائنٹس کی کمی کے ساتھ 165,596.06 پوائنٹس پر بند ہوا۔

بین الاقوامی سطح پر گلف میں نئے ڈرون حملوں کے باعث خام تیل کی قیمتوں اور بانڈ ییلڈز میں اضافے کے بعد پیر کو ایشیائی شیئرز مارکیٹیں مندی کا شکار رہیں۔ دوسری جانب رواں ہفتے این ویڈیا کے مالیاتی نتائج کی رپورٹ سامنے آنے کے بعد آرٹیفیشل انٹیلیجنس (اے آئی) کی حالیہ تیزی کا بھی ایک بڑا امتحان متوقع ہے۔

متحدہ عرب امارات میں ایک ڈرون حملے کے باعث نیوکلیئر پاور پلانٹ میں آگ بھڑک اٹھی جبکہ سعودی عرب نے تین ڈرونز مار گرانے کا دعویٰ کیا ہے۔ اسی دوران امریکی صدر ڈونلڈ ٹرمپ نے انتباہ جاری کیا ہے کہ ایران کو کسی معاہدے تک پہنچنے کے لیے جلد قدم اٹھانا ہوگا۔

دریں اثنا اہم آبنائے ہرمز سے شپنگ کی آمد و رفت انتہائی معمولی حد تک رہ گئی ہے اور یہ تقریباً بند پڑا ہے کیونکہ تہران اس آبی گزرگاہ پر اپنا کنٹرول باقاعدہ بنانے کی کوشش کر رہا ہے جہاں سے عام حالات میں دنیا کی 20 فیصد تیل کی تجارت ہوتی ہے۔

آبنائے ہرمز کی صورتحال اور اہم خام مال کی سپلائی پر تبادلہ خیال کے لیے جی 7 وزرائے خارجہ پیر کو پیرس میں سر جوڑ رہے ہیں تاہم جیو پولیٹیکل اختلافات کے باعث اس گروپ کے اتحاد کا ایک بڑا امتحان متوقع ہے۔

بدھ کو فیڈرل ریزرو کے گزشتہ اجلاس کے منٹس جاری کیے جائیں گے جن سے یہ واضح ہونے کی امید ہے کہ کمیٹی پر غیر جانبدارانہ موقف اپنانے کے لیے کتنا دباؤ تھا۔

دوسری جانب گزشتہ ہفتے ریکارڈ بلندی سے 2 فیصد گرنے کے بعد جاپان کا نکی انڈیکس مزید 1.1 فیصد گر گیا۔ سیمی کنڈکٹرز کی زبردست طلب کے باعث ریکارڈ بلندیوں کو چھونے کے بعد جنوبی کوریا کی اسٹاک مارکیٹ میں بھی تھوڑی ٹھنڈک دیکھی گئی اور اس میں 0.1 فیصد کی کمی ہوئی۔

علاوہ ازیں جاپان کے علاوہ ایشیا پیسیفک شیئرز کے وسیع ترین ایم ایس سی آئی انڈیکس میں بھی 0.9 فیصد کی گراوٹ ریکارڈ کی گئی۔

دریں اثنا پیر کو انٹر بینک مارکیٹ میں ڈالر کے مقابلے میں روپے کی قدر میں معمولی اضافہ دیکھا گیا۔ کاروبار کے اختتام پر مقامی کرنسی ڈالر کے مقابلے میں 1 پیسے (0.01 روپے) کے اضافے کے بعد 278.60 پر بند ہوئی۔

آل شیئرز انڈیکس پر کاروباری حجم (والیم) پچھلے سیشن کے 62 کروڑ 54 لاکھ (625.45 ملین) شیئرز سے کم ہو کر 49 کروڑ 97 لاکھ (499.79 ملین) شیئرز رہ گیا۔

شیئرز کی مالیت بھی گزشتہ سیشن کے 22 ارب 31 کروڑ (22.31 ارب) روپے کے مقابلے میں کم ہو کر 19 ارب 44 کروڑ (19.44 ارب) روپے ریکارڈ کی گئی۔

دوست اسٹیلز لمیٹڈ 4 کروڑ (40.06 ملین) شیئرز کے ساتھ کاروباری حجم میں سرِفہرست رہی، جس کے بعد کے الیکٹرک لمیٹڈ 3 کروڑ 25 لاکھ (32.51 ملین) شیئرز اور کریسنٹ اسٹار انشورنس 2 کروڑ 63 لاکھ (26.32… ملین) شیئرز کے ساتھ نمایاں رہیں۔

پیر کو مجموعی طور پر 487 کمپنیوں کے شیئرز کا کاروبار ہوا، جن میں سے 66 کمپنیوں کے شیئرز کی قیمتوں میں اضافہ، 383 میں کمی ریکارڈ کی گئی، جبکہ 38 کمپنیوں کے شیئرز کی قیمتیں مستحکم رہیں۔