ڈبلیو ایچ او کے مطابق یہ وبا بنڈی بوگیو وائرس کی وجہ سے پھیلی ہے، تاہم یہ عالمی وبا (پینڈیمک) کے معیار پر پوری نہیں اترتی، لیکن جمہوریہ کانگو سے زمینی سرحدیں رکھنے والے ممالک کو اس سے شدید خطرہ لاحق ہے۔

اقوام متحدہ کے صحت کے ادارے نے بتایا کہ ہفتے تک کانگو کے صوبے ایتوری میں کم از کم 80 مشتبہ اموات، 8 لیبارٹری میں تصدیق شدہ کیسز اور 246 مشتبہ کیسز رپورٹ ہوئے ہیں۔ یہ کیسز کم از کم تین صحتی علاقوں—بونیا، رمپارا اور منگبالو—میں سامنے آئے ہیں۔

یوگنڈا کے دارالحکومت کمپالا میں بھی دو الگ مگر لیبارٹری سے تصدیق شدہ کیسز رپورٹ ہوئے ہیں، جن میں ایک موت شامل ہے۔ یہ افراد کانگو سے سفر کر کے آئے تھے۔ اسی طرح کانگو کے دارالحکومت کنشاسا میں بھی ایک کیس رپورٹ ہوا ہے۔

ڈبلیو ایچ او نے خبردار کیا ہے کہ صورتحال غیر معمولی ہے کیونکہ اس وائرس کے لیے کوئی منظور شدہ ویکسین یا مخصوص علاج موجود نہیں۔ ادارے نے متاثرہ ممالک کو ہدایت دی ہے کہ مریضوں کو فوری طور پر آئسولیٹ کیا جائے، رابطوں کی نگرانی کی جائے اور سرحدی اسکریننگ سخت کی جائے۔

تاہم ڈبلیو ایچ او نے یہ بھی کہا ہے کہ خوف کی بنیاد پر سرحدیں بند کرنا یا تجارت روکنا درست نہیں ہوگا، کیونکہ اس سے غیر رسمی اور غیر نگرانی شدہ آمد و رفت بڑھ سکتی ہے۔