افق پر کچھ ایسے ابتدائی سگنلز ابھر رہے ہیں جو اس بات کی نوید ہیں کہ ملکی معیشت ایک بڑے اور مثبت موڑ کی طرف گامزن ہو چکی ہے۔ اگرچہ یہ اشارے ابھی دھندلے اور ابتدائی نوعیت کے ہیں لیکن ان میں اتنا ٹھوس پن ضرور موجود ہے کہ وہ پالیسی سازوں کی ترجیحات اور سرمایہ کاروں کے فیصلوں کو یکسر بدلنے کی طاقت رکھتے ہیں۔

بیرونی مالیاتی محاذ: شدید دباؤ کے بادل چھٹنے لگے، بہتری کا آغاز

دو اہم اشاریے غیر ملکی زرِ مبادلہ کے ذخائر اور سمندر پار پاکستانیوں کی بھیجی گئی ترسیلاتِ زر (رِیمیٹنسز) پاکستان کی بیرونی مالیاتی پوزیشن کا جائزہ لینے کے لیے ایک واضح آئینہ فراہم کرتے ہیں۔

اسٹیٹ بینک کے اعداد و شمار ظاہر کرتے ہیں کہ غیر ملکی زرِ مبادلہ کے ذخائر، جو 2023 کے آغاز میں گر کر تقریباً 3 سے 4 ارب ڈالر کی انتہائی تشویشناک سطح پر آ گئے تھے، اپریل 2026 تک بحال ہو کر 15 ارب ڈالر سے تجاوز کر چکے ہیں، جبکہ کل مائع (لیقویڈ) ذخائر 20 ارب ڈالر سے اوپر ہیں۔ یہ بحالی کثیر الجہتی فنڈز کی آمد، برادر ممالک کی مائلی مدد اور بیرونی کھاتوں کے بہتر انتظام کا نتیجہ ہے۔

اسی طرح ترسیلاتِ زر میں بھی نمایاں بہتری دیکھی گئی ہے، جہاں حالیہ مہینوں میں ماہانہ آمد 3 ارب ڈالر سے تجاوز کر گئی ہے اور رواں مالی سال کے اب تک کے اعداد و شمار گزشتہ سال کے مقابلے میں کافی بہتر ہیں۔ یہ تبدیلی انتہائی اہم ہے، کیونکہ اس سے قبل ایکسچینج ریٹ کی خرابیوں اور غیر قانونی مارکیٹ (حوالہ ہنڈی) کی وجہ سے ان قانونی فنڈز میں بڑی کمی واقع ہو گئی تھی۔

ان دونوں پیش رفتوں کو ملا کر دیکھا جائے تو معلوم ہوتا ہے کہ بیرونی لیکویڈٹی (نقدی) کا دباؤ اب کافی حد تک کم ہو چکا ہے۔ یہ دباؤ مکمل ختم تو نہیں ہوا لیکن اب یہ بحران کی سطح پر بھی نہیں رہا۔

میکرو اکنامک استحکام : ایک لازمی مرحلہ

بیرونی ذخائر میں بہتری کے ساتھ ساتھ ایکسچینج ریٹ (روپے کی قدر) کا اتار چڑھاؤ بھی ماضی کے مقابلے میں تھم گیا ہے، سالانہ بنیادوں پر مہنگائی کی شرح میں کمی کا رجحان شروع ہو چکا ہے اور آئی ایم ایف سمیت دیگر عالمی شراکت داروں کے ساتھ روابط نے مستقبل کی فنانسنگ کو کسی حد تک واضح کر دیا ہے۔ یاد رہے کہ یہ استحکام ہے ’بحالی‘ نہیں، اور اس فرق کو سمجھنا بہت ضروری ہے۔ استحکام غیر یقینی صورتحال کو کم کرتا ہے، جبکہ بحالی کے لیے مکمل اعتماد کی ضرورت ہوتی ہے۔

سرمایہ کاری کا رویہ : پیش گوئی کی صلاحیت ہی بنیادی محرک ہے

سرمایہ کاری کے فیصلے محض میکرو اکنامک اشاریوں یا مراعاتی پیکیجز کو دیکھ کر نہیں کیے جاتے۔ یہ بنیادی طور پر اس بات پر منحصر ہوتے ہیں کہ نظام میں کس حد تک پریڈیکٹیبلٹی (پیش گوئی کی صلاحیت یا استحکام) موجود ہے۔

دنیا کی کسی بھی ابھرتی ہوئی مارکیٹ میں سرمایہ کاری لانے کے لیے تین پائیدار اصول طے ہیں، اول پالیسی کا واضح رخ، دوم ٹیکس اور ریگولیٹری نظام کا تسلسل اور سوم فیصلوں پر عمل درآمد کی مضبوط ساکھ۔ ان کے بغیر سرمائے کو راغب کرنا ممکن نہیں ہوتا۔

اگر یہ شرائط موجود نہ ہوں تو بڑی سے بڑی مراعات بھی پائیدار سرمایہ کاری کو راغب کرنے میں ناکام رہتی ہیں۔ اس کے برعکس جہاں یہ شرائط پوری ہوں، وہاں سرمائے کی واپسی شروع ہو جاتی ہے خواہ وہ معیشت بنیادی طور پر کتنی ہی کمزور کیوں نہ ہو۔

بین الاقوامی بینکنگ، خاص طور پر خلیجی ممالک (گلف) میں کام کرنے کے اپنے تجربے کی بنیاد پر میں نے اس صورتحال کو بارہا دیکھا ہے۔ مارکیٹیں مشکل ماحول میں بھی کام کرنے کے لیے تیار ہو جاتی ہیں لیکن وہ جس چیز کا مقابلہ نہیں کر سکتیں، وہ ہے ’پالیسیوں کا عدم تسلسل‘۔ خطرے (رسک) کی قیمت متعین کی جا سکتی ہے لیکن غیر یقینی صورتحال کی نہیں۔

جیو پولیٹکس اور اسٹریٹجک سگنلز

خلیج میں حالیہ پیش رفت نے پاکستان کے معاشی منظر نامے کو ایک اہم بیرونی جہت دی ہے۔ ایران اور امریکہ کے درمیان کشیدگی کے حالیہ مرحلے کے دوران پاکستان نے ایک فعال سفارتی ثالث کے طور پر کردار ادا کیا، جس سے کشیدگی کم کرنے اور مذاکرات کو فروغ دینے کی کوششوں کو مدد ملی۔

یہ پاکستان کے اسٹریٹجک رویے میں ایک بڑی تبدیلی کی عکاسی کرتا ہے۔ فیلڈ مارشل عاصم منیر کی قیادت میں پاکستان نے ایک نپے تلے اور روابط پر مبنی نقطہ نظر کو اپنایا ہے، جس سے وہ اس پیچیدہ علاقائی ماحول میں ایک قابلِ اعتماد اور امن پسند ملک کے طور پر ابھرا ہے۔

اسی کے ساتھ، اہم خلیجی شراکت داروں کے ساتھ پاکستان کے دفاعی اور سیکیورٹی تعلقات مزید مضبوط ہو رہے ہیں۔ خاص طور پر پاکستان نے سعودی عرب کے ساتھ دفاعی تعاون اور سیکیورٹی فریم ورک کا معاہدہ کیا ہے، جو گہرے ادارہ جاتی اعتماد اور طویل مدتی اسٹریٹجک ہم آہنگی کو ظاہر کرتا ہے۔

قطر کے ساتھ بھی پاکستان کے روابط اسی سمت میں آگے بڑھ رہے ہیں، جہاں سیکیورٹی اور اسٹریٹجک شعبوں میں تعاون کو وسعت دی جا رہی ہے۔

یہ پیش رفت محض سفارتی نوعیت کی نہیں ہے۔ یہ پاکستان کی پوزیشن کو ایک قابلِ اعتماد سیکیورٹی اور اسٹریٹجک پارٹنر کے طور پر مضبوط کرتی ہے، جس کے دور رس معاشی اثرات ہوتے ہیں۔ ایک ایسے ماحول میں جہاں جیو پولیٹیکل خطرات کا نئے سرے سے جائزہ لیا جا رہا ہو، جو ممالک اپنی عملی اہمیت اور اسٹریٹجک ساکھ ثابت کرتے ہیں انہیں سرمایہ کاروں کے بہتر تاثر، کم رسک پریمیم اور معاشی تعاون کے وسیع تر مواقع کی شکل میں فائدہ ملتا ہے۔

اس لحاظ سے پاکستان کے یہ بیرونی روابط معیشت کی بہتری کے لیے سازگار ماحول پیدا کرنا شروع کر رہے ہیں، چاہے ان کا مالیاتی اثر فوری طور پر ظاہر ہونے کے بجائے کچھ وقت لے کر ہی سامنے آئے۔

حقیقی معیشت میں ابتدائی چکر کے اشارے

استحکام سے معاشی سرگرمیوں کی طرف منتقلی کے اثرات سب سے پہلے ابتدائی معاشی اشاریوں میں دکھائی دیتے ہیں۔ حالیہ ڈیٹا معیشت کے بتدریج معمول پر آنے کی نشان دہی کرتا ہے۔

بڑے پیمانے کی مینوفیکچرنگ (ایل ایس ایم)، جس میں مالی سال 23–2022 کے دوران نمایاں کمی آئی تھی نے حالیہ مہینوں میں وقفے وقفے سے بہتری دکھائی ہے اور کچھ ذیلی شعبے نچلی سطح سے دوبارہ اوپر اٹھ رہے ہیں۔

گاڑیوں کی فروخت، جو معاشی سست روی کے دوران شدید گر گئی تھی اب ماہانہ بنیادوں پر بہتر سطح پر آ چکی ہے، جو صارفین کی مانگ میں جزوی واپسی کو ظاہر کرتی ہے۔

اسی طرح سیمنٹ کی سپلائی جسے عام طور پر تعمیراتی سرگرمیوں کا پیمانہ مانا جاتا ہے بتدریج مستحکم ہوئی ہے، اگرچہ یہ حجم اب بھی تاریخی اوسط سے کم ہے۔ نجی شعبے کے لیے قرضے، جو اب بھی بلند شرح سود کی وجہ سے محدود ہیں اب سکڑنے کے بجائے استحکام کی طرف مائل ہیں اور ورکنگ کیپیٹل فنانسنگ میں منتخب طور پر دوبارہ سرمایہ لگایا جا رہا ہے۔

مشینری اور خام مال کی درآمدات بھی معمول پر آنا شروع ہو گئی ہیں۔ یہ ایک اہم اشارہ ہے اس سے پتہ چلتا ہے کہ کمپنیاں اب محض بقا کی جنگ لڑنے کے بجائے آہستہ آہستہ اپنے پروڈکشن سائیکل کو دوبارہ بحال کر رہی ہیں۔

بزنس کانفیڈنس(کاروباری اعتماد) کے اشاریے بشمول اوورسیز انویسٹرز چیمبر آف کامرس اینڈ انڈسٹری (اوآئی سی سی اینڈ آئی) کے سروے ماضی کے مقابلے میں بہتر جذبات کی نشان دہی کرتے ہیں، حالانکہ یہ اب بھی اوسط سطح سے نیچے ہیں۔

انفرادی طورپر یہ اشارے شاید معمولی لگیں لیکن مجموعی طور پر یہ سب ایک ہی سمت اشارہ کرتے ہیں،معیشت اب اپنے سب سے مشکل دور (تھرمل پوائنٹ) سے باہر نکل رہی ہے۔

معاشی سرگرمیوں سے مہنگائی کے رجحان تک

اگر ان سازگار حالات کو برقرار رکھا جائے تو یہ پیش رفت وقت کے ساتھ پیداواری صلاحیت میں اضافے، سپلائی چین کی بہتری اور لاگت کے دباؤ میں کمی کا باعث بن سکتی ہے۔

مہنگائی پر قابو پانے کے لیے یہ چیز انتہائی اہم ہے۔ اگرچہ قیمتوں کا تعین کئی عوامل سے ہوتا ہے جن میں توانائی کی قیمتیں، مالیاتی ایڈجسٹمنٹس اور عالمی رجحانات شامل ہیں لیکن مہنگائی کومستقل طور پر کم کرنے کے لیے سپلائی کی سائیڈ (پیداوار) کا مضبوط ہونا لازمی ہے۔

عملی الفاظ میں اس کا مطلب یہ ہے کہ مہنگائی یکدم ختم ہونے کے بجائے آہستہ آہستہ کم ہوگی۔

پالیسی ڈسپلن: فیصلہ کن عامل

موجودہ مرحلہ اب بھی نازک ہے۔ معاشی استحکام کو قابلِ سرمایہ کاری بنانے اور سرمایہ کاری کو ترقی میں بدلنے کے لیے پائیدار پالیسی ڈسپلن کی ضرورت ہے۔

میکرو اکنامک پالیسی میں تسلسل، مالیاتی خسارے میں کمی (فیسکل کنسولیڈیشن)، ریگولیٹری نظام کا استحکام اور نجی شعبے کے ساتھ منظم روابط اس کے لیے ناگزیر ہوں گے۔

اب اصل خطرہ مواقع کی کمی نہیں بلکہ فیصلوں پر عمل درآمد میں عدم تسلسل ہے۔

نتیجہ: تبدیلی کا ایک موقع

پاکستان ابھی مکمل بحالی کے مرحلے میں داخل نہیں ہوا۔ تاہم یہ ایک ایسے عبوری دور میں داخل ہو رہا ہے جہاں معاشی استحکام اب محتاط اعتماد کو سہارا دے رہا ہے۔

بیرونی ذخائر میں بہتری، صنعتی اشاریوں میں بتدریج ابھار اور بہتر جیو پولیٹیکل پوزیشن مل کر یہ ظاہر کرتے ہیں کہ معیشت ایک مستحکم بنیاد کی طرف بڑھ رہی ہے۔ اب اصل موقع یہ ہے کہ اس استحکام کو مستقل سرمایہ کاری میں تبدیل کیا جائے۔ یہ مقصد محض اعلانات سے حاصل نہیں ہوگا، بلکہ اس کے لیے تسلسل، ساکھ اور ٹھوس عمل درآمد درکار ہے۔

اگر یہ شرائط برقرار رہیں تو پاکستان استحکام کے دور سے نکل کر پائیدار سرمایہ کاری کے دائرے میں داخل ہو سکتا ہے، جہاں بڑھتا ہوا اعتماد معاشی ترقی، روزگار کے مواقع اور مہنگائی میں بتدریج کمی کی شکل اختیار کر لے گا۔ موقع کا یہ وقت بہت مختصر ہے لیکن یہ حقیقی ہے۔

کاپی رائٹ بزنس ریکارڈر 2026