وزیراعظم نے یہ بات ہفتہ کو جاری کیے گئے ایک سرکاری بیان میں کہی، جو انٹرنیشنل ڈے آف لیونگ ٹوگیدر ان پیس کے حوالے سے جاری کیا گیا تھا۔

بیان کے مطابق وزیراعظم نے کہا کہ آج پاکستان عالمی برادری کے ساتھ مل کر امن کے ساتھ باہمی ہم آہنگی کے عالمی دن کی مناسبت سے یہ دن منا رہا ہے۔

انہوں نے کہا کہ آئینی سطح پر انسانی حقوق کی ضمانتوں کے ساتھ ساتھ مؤثر پالیسی اور عملی اقدامات بھی ناگزیر ہیں۔

اس سلسلے میں انہوں نے کہا کہ حکومت نے نیشنل ایکشن پلان برائے انسانی حقوق تشکیل دیا ہے، جس کا مقصد خواتین کو بااختیار بنانا، بچوں کا تحفظ اور کمزور و محروم طبقات کے حقوق کا فروغ ہے۔

وزیراعظم کے مطابق حکومت انسانی حقوق آگاہی پروگرام کے ذریعے برداشت، اتحاد اور سماجی ہم آہنگی کی اقدار کو فروغ دے رہی ہے۔

انہوں نے بتایا کہ صوبائی سطح پر ڈسٹرکٹ ہیومن رائٹس کمیٹیاں بھی قائم کی گئی ہیں تاکہ نچلی سطح پر سماجی ہم آہنگی کو فروغ دیا جا سکے۔

وزیراعظم نے کہا کہ ان اقدامات کو مزید مضبوط بنانے کے لیے ٹیکنالوجی کے ذریعے ہونے والے صنفی تشدد کی روک تھام کے لیے نیشنل اسٹریٹیجی اور منیارٹی ویلفیئر فنڈ بھی متعارف کرایا گیا ہے۔

اسی جذبے کے تحت حکومت نے ایسے اہم قانونی اصلاحات متعارف کرائی ہیں جن کا مقصد نقصان دہ سماجی رویوں اور تشدد کا خاتمہ ہے۔

حکومت نے اسلام آباد کیپیٹل ٹیریٹری ڈومیسٹک وائلنس پریوینشن اینڈ پروٹیکشن ایکٹ 2026، آئی سی ٹی چائلڈ میریج ریسٹرینٹ ایکٹ 2025 اور نیشنل کمیشن فار مائنارٹی رائٹس ایکٹ 2025 نافذ کیے ہیں۔

وزیراعظم نے کہا کہ میں نوجوانوں، مذہبی رہنماؤں اور سول سوسائٹی سے اپیل کرتا ہوں کہ وہ برداشت، ہمدردی اور بقائے باہمی کے فروغ میں اپنا کردار ادا کریں۔ آئیے ہم سب مل کر ایک ایسا پاکستان اور دنیا تشکیل دیں جہاں ہم آہنگی اور مشترکہ خوشحالی، تقسیم اور اختلاف پر غالب ہو۔

کاپی رائٹ بزنس ریکارڈر، 2026