یہ پیش رفت اس وقت سامنے آئی جب احد چیمہ اور وزیرِاعظم آفس کے مشیر ڈاکٹر توقیر شاہ نے این ڈی ایم پی سے متعلق اجلاس کی مشترکہ صدارت کی، جس میں پاکستان کے ڈیجیٹل تبدیلی کے ایجنڈے پر پیش رفت کا جائزہ لیا گیا اور وفاقی و صوبائی اسٹیک ہولڈرز کے درمیان رابطہ کاری کو مزید مضبوط بنانے پر غور کیا گیا۔ یہ بات اقتصادی امور ڈویژن (ای اے ڈی) کے بیان میں بتائی گئی ہے۔

تفصیلات کے مطابق اجلاس میں وفاقی وزیر برائے آئی ٹی و ٹیلی کام شزا فاطمہ خواجہ، سیکرٹری آئی ٹی ضرار ہاشم خان، چیئرمین پاکستان ڈیجیٹل اتھارٹی ڈاکٹر سہیل منیر سمیت سینئر حکام نے شریک چیئرمینز کو قومی ڈیجیٹل ماسٹر پلان کے تحت عملدرآمد کے روڈ میپ، ادارہ جاتی رابطہ کاری کے نظام اور جاری اقدامات پر بریفنگ دی۔

بیان کے مطابق اجلاس کے دوران وفاقی وزیر احد چیمہ نے وزارتِ آئی ٹی و ٹیلی کمیونیکیشن کی جانب سے صوبائی حکومتوں کے ساتھ فعال رابطہ کاری کو سراہا اور زور دیا کہ این ڈی ایم پی کی کامیاب عملدرآمد کے لیے صوبوں کی مضبوط شمولیت ناگزیر ہے۔

انہوں نے کہا کہ این ڈی ایم پی ایک قومی فریم ورک ہے جس کا مقصد معیشت کے تمام شعبوں بشمول تعلیم، صحت، زراعت، ٹیکس نظام، سماجی تحفظ، توانائی، لاجسٹکس اور عوامی خدمات کی فراہمی میں جامع اور مربوط ڈیجیٹل تبدیلی کو یقینی بنانا ہے۔

احد چیمہ نے امید ظاہر کی کہ این ڈی ایم پی پر تمام صوبوں کے ساتھ مشاورت آئندہ وفاقی بجٹ سے قبل مکمل کر لی جائے گی تاکہ ترجیحات میں ہم آہنگی، عملدرآمد کی تیاری اور اگلے مالی سال کے لیے مؤثر وسائل کی منصوبہ بندی ممکن بنائی جا سکے۔

وفاقی وزیر نے مزید کہا کہ وہ توقع رکھتے ہیں کہ صوبائی حکومتیں بجٹ سے قبل وزارتِ آئی ٹی کے ساتھ اپنی آراء اور مشاورت کو حتمی شکل دیں گی۔ انہوں نے مزید کہا کہ بین الصوبائی تعاون میں بہتری سے مربوط ڈیجیٹل نظاموں کی تشکیل، سروس ڈلیوری میں بہتری اور حکومتی امور میں شفافیت اور کارکردگی کو فروغ ملے گا۔

اجلاس میں شریک افراد نے ترقیاتی منصوبوں کے پی سی-ون میں ایک علیحدہ ”ڈیجیٹل ٹرانسفارمیشن کالم“ متعارف کرانے کی تجویز کا بھی جائزہ لیا، جو ماحولیاتی جزو کی طرز پر ہوگا جو پہلے ہی منصوبہ بندی میں شامل ہوتا ہے۔

ای اے ڈی کے مطابق اس تجویز کا مقصد یہ ہے کہ منصوبوں کے ڈیزائن اور عملدرآمد کے آغاز ہی سے ڈیجیٹل انضمام اور ٹیکنالوجی کے استعمال کو یقینی بنایا جائے، تاکہ مختلف شعبوں میں حکمرانی، کارکردگی، شفافیت اور سروس ڈلیوری میں بہتری لائی جا سکے۔

اجلاس کو مزید بریفنگ دی گئی کہ قومی ڈیجیٹل ماسٹر پلان (این ڈی ایم پی) کا مقصد پاکستان کو ڈیجیٹل انفرااسٹرکچر، ملک گیر رابطہ کاری، ڈیجیٹل مہارتوں کی ترقی، جدت پر مبنی نظام اور جدید طرزِ حکمرانی میں سرمایہ کاری کے ذریعے ایک نمایاں ڈیجیٹل ریاست میں تبدیل کرنا ہے۔

ماسٹر پلان میں ڈیجیٹل کاروباری سرگرمیوں کے فروغ، سرکاری شعبے کی ڈیجیٹل خدمات کو مضبوط بنانے، محفوظ اور باہمی طور پر مربوط ڈیجیٹل عوامی انفرااسٹرکچر کی فراہمی، اور ایسی ٹیکنالوجی پر مبنی معیشت کے قیام پر بھی توجہ دی گئی ہے جو سرمایہ کاری کو متوجہ کرنے اور نوجوانوں کے لیے روزگار کے مواقع پیدا کرنے کی صلاحیت رکھتی ہو۔

احد چیمہ نے کہا کہ ڈیجیٹل ماسٹر پلان کا اصل فائدہ عام عوام کو پہنچے گا کیونکہ اس سے انسانی مداخلت کم ہوگی اور سرکاری خدمات تک رسائی میں آسانی پیدا ہوگی۔

انہوں نے کہا کہ شہریوں کو بنیادی سرکاری سہولیات اور خدمات کے حصول کے لیے دفاتر کے چکر نہیں لگانا پڑیں گے، جس سے کارکردگی، شفافیت اور سہولت میں نمایاں بہتری آئے گی۔