عباس عراقچی نے امریکا کے اتحادی متحدہ عرب امارات پر بھی ایران کے خلاف فوجی کارروائیوں میں براہِ راست ملوث ہونے کا الزام عائد کیا، جو ایک نادر موقع تھا کیونکہ 28 فروری کو امریکا اور اسرائیل جنگ کی جانب سے ایران کے خلاف جنگ کے آغاز کے بعد ایرانی اور اماراتی حکام ایک ہی کمرے میں موجود تھے۔

عباس عراقچی نے کہا کہ ایران ”غیر قانونی توسیع پسندی اور جنگجویانہ پالیسیوں کا شکار“ ہے۔ انہوں نے برکس پلس گروپنگ، جس میں برازیل، روس، بھارت، چین، جنوبی افریقہ، مصر، ایتھوپیا، انڈونیشیا، ایران اور متحدہ عرب امارات شامل ہیں، سے اپیل کی کہ وہ ”مغربی بالادستی اور اس استثنا کے احساس“ کی مزاحمت کریں جس کے بارے میں امریکا سمجھتا ہے کہ وہ اس کا حق رکھتا ہے۔

ایران کے وزیرِ خارجہ نے کہا کہ ”لہٰذا ایران برکس رکن ممالک اور بین الاقوامی برادری کے تمام ذمہ دار ارکان سے مطالبہ کرتا ہے کہ وہ واضح طور پر امریکا اور اسرائیل کی جانب سے بین الاقوامی قوانین کی خلاف ورزیوں کی مذمت کریں۔“

بعد ازاں انہوں نے اجلاس کو بتایا کہ متحدہ عرب امارات “میرے ملک کے خلاف جارحیت میں براہِ راست ملوث” ہے، یہ بات ایرانی نیم سرکاری خبر ایجنسی مہر نے رپورٹ کی۔ اس اجلاس میں متحدہ عرب امارات کی نمائندگی نائب وزیرِ خارجہ خلیفہ شہین المَرار کر رہے تھے۔

امریکا اور اسرائیل کے ایران پر حملوں کے جواب میں تہران نے خلیجی ممالک، بشمول متحدہ عرب امارات، پر حملے کیے۔ ان اختلافات کے باعث برکس، جو اتفاقِ رائے کے اصول پر کام کرتا ہے، کے لیے مشترکہ اعلامیے پر متفق ہونا مشکل ہو سکتا ہے۔

ابھی یہ واضح نہیں ہو سکا کہ آیا متحدہ عرب امارات اور دیگر ممالک نے عراقچی کے ان ریمارکس کا کوئی جواب دیا ہے یا نہیں۔

منقسم ترجیحات

بھارت، جو متحدہ عرب امارات کے ساتھ اپنے تعلقات کو مزید گہرا کر رہا ہے، 2026 میں برکس کی صدارت سنبھالے گا اور ان فریقوں میں شامل ہے جو ایران کی جانب سے جنگ کے دوران آبنائے ہرمز کی عملی بندش سے سب سے زیادہ متاثر ہوئے ہیں۔

یہ آبی گزرگاہ عام طور پر عالمی تیل کی تقریباً پانچویں حصے کی ترسیل سنبھالتی ہے، اور اس کی بندش نے حالیہ تاریخ کے بڑے سپلائی بحرانوں میں سے ایک کو جنم دیا ہے۔ بھارت، جو دنیا کا تیسرا بڑا تیل درآمد کنندہ ہے اور اس راستے کا بڑا صارف بھی ہے، کو شدید سپلائی تعطل اور خلیج میں بحری حملوں کے دوران اپنے ملاحوں کے جانی نقصان کا سامنا کرنا پڑا ہے۔

اگرچہ جنگ بندی نافذ ہے، تاہم وقفے وقفے سے حملے جاری ہیں۔

بدھ کے روز ایک بھارتی پرچم بردار جہاز، جو صومالیہ سے متحدہ عرب امارات جا رہا تھا اور زندہ مویشیوں کی کھیپ لے جا رہا تھا، عمانی پانیوں میں آگ لگنے کے بعد ڈوب گیا، تاہم عملے کے تمام 14 ارکان کو عمانی کوسٹ گارڈ نے بچا لیا۔ بھارت نے حملے کی نوعیت یا ذمہ دار فریق کی وضاحت نہیں کی، تاہم برطانوی میری ٹائم رسک مینجمنٹ گروپ وینگارڈ نے کہا ہے کہ یہ واقعہ ایک دھماکے سے پیش آیا جو غالباً ڈرون یا میزائل حملے کے نتیجے میں ہوا۔

بھارتی وزیرِ خارجہ سبرامنیم جے شنکر نے کہا کہ ”بحری ٹریفک کے لیے جاری خطرات، اور توانائی کے بنیادی ڈھانچے میں رکاوٹیں صورتحال کی نزاکت کو ظاہر کرتی ہیں۔ بین الاقوامی آبی راستوں، بشمول آبنائے ہرمز اور بحیرہ احمر، سے محفوظ اور بلا رکاوٹ بحری ترسیل عالمی معاشی بہتری کے لیے ناگزیر ہے۔“

انہوں نے کسی فریق کا نام لیے بغیر یہ بھی کہا کہ ”یکطرفہ جابرانہ اقدامات اور بین الاقوامی قانون اور اقوامِ متحدہ کے چارٹر سے متصادم پابندیوں کا بڑھتا ہوا رجحان“ تشویشناک ہے۔

”ایسے اقدامات ترقی پذیر ممالک کو غیر متناسب طور پر متاثر کرتے ہیں،” انہوں نے کہا۔ ”یہ غیر منصفانہ اقدامات مکالمے کا متبادل نہیں ہو سکتے، اور نہ ہی دباؤ سفارت کاری کی جگہ لے سکتا ہے۔“

بیجنگ کے دورے کے دوران، جو برکس اجلاس کے ساتھ ہی ہوا، امریکی صدر ڈونلڈ ٹرمپ نے چین کے صدر شی جن پنگ کے ساتھ ایران جنگ پر بات چیت کی، اور وائٹ ہاؤس کے ایک اہلکار کے مطابق دونوں رہنماؤں نے اتفاق کیا کہ آبنائے ہرمز کو کھلا رہنا چاہیے اور تہران کو کبھی جوہری ہتھیار حاصل نہیں کرنے چاہییں۔