یہ پیش رفت وفاقی وزیرِ پٹرولیم علی پرویز ملک سے اسلام آباد میں بیرک گولڈ کے چیئرمین جان ایل تھورنٹن کی ملاقات کے دوران سامنے آئی جس میں فلیگ شپ مائننگ پروجیکٹ پر ہونے والی پیش رفت کا جائزہ لیا گیا۔

پٹرولیم ڈویژن کی جانب سے جاری اعلامیے کے مطابق یہ ملاقات ریکوڈک منصوبے پر ہونے والی پیش رفت کا جائزہ لینے اور آئندہ کے لائحہ عمل پر تبادلہ خیال کے لیے منعقد کی گئی۔

ملاقات کے دوران دونوں جانب سے ریکوڈک منصوبے پر ہونے والی پیش رفت اور اس کی ترقی سے متعلق امور پر تبادلہ خیال کیا گیا جب کہ منصوبے کو آگے بڑھانے کے لیے جاری کوششوں کا بھی جائزہ لیا گیا۔

علی پرویز ملک نے پاکستان کی معاشی ترقی اور معدنی شعبے کے فروغ میں ریکوڈک منصوبے کی تزویراتی اہمیت اجاگر کرتے ہوئے کہا کہ یہ ایک اہم قومی منصوبہ ہے جو غیر ملکی سرمایہ کاری کے فروغ، روزگار کے نئے مواقع پیدا کرنے اور بلوچستان کی سماجی و اقتصادی ترقی کو تیز کرنے میں کلیدی کردار ادا کرے گا۔

اس موقع پر بیرک گولڈ کے چیئرمین نے ریکوڈک منصوبے سے اپنی وابستگی اور عزم کا اعادہ کرتے ہوئے اس منصوبے کو آگے بڑھانے میں حکومتِ پاکستان کے تعاون کو سراہا۔

ریکوڈک منصوبے میں 50 فیصد حصص بیرک گولڈ کے پاس ہیں جب کہ 25 فیصد حصص وفاقی حکومت کی تین سرکاری کمپنیوں کی ملکیت میں ہیں اور بقیہ 25 فیصد حصص حکومتِ بلوچستان کے پاس ہیں۔

دونوں فریقین نے اہم سنگ میل کی بروقت تکمیل کے لیے قریبی ہم آہنگی برقرار رکھنے پر اتفاق کیا۔

پٹرولیم ڈویژن کے مطابق ملاقات خوشگوار اور مثبت ماحول میں اختتام پذیر ہوئی جس میں دونوں فریقین نے ریکوڈک منصوبے کی پیش رفت کے لیے مشترکہ طور پر کام جاری رکھنے کے عزم کا اعادہ کیا۔