اس ملاقات کے دوران پاکستان اور بنگلہ دیش کے درمیان منشیات کی اسمگلنگ کی روک تھام اور دہشت گردی کے خاتمے کے لیے مفاہمتی یادداشت (ایم او یو) پر دستخط کیے گئے۔ توقع ہے کہ یہ معاہدہ جنوبی ایشیا میں پھیلے ہوئے بین الاقوامی منشیات اسمگلنگ نیٹ ورکس اور دہشت گردی کی مالی معاونت کے خاتمے میں اہم کردار ادا کرے گا۔

ملاقات میں دونوں فریقین نے سرحد پار جرائم کے انسداد، انٹیلی جنس کے تبادلے اور سائبر سیکیورٹی کے شعبوں میں تعاون پر بھی تفصیلی گفتگو کی۔

وفاقی وزیر داخلہ اور پی سی بی چیئرمین محسن نقوی دو روزہ سرکاری دورے پر بنگلہ دیش کے دارالحکومت ڈھاکہ پہنچے، جہاں ایئرپورٹ پر ان کا پرتپاک استقبال بنگلہ دیش کی وزارتِ خارجہ کے سیکرٹری اسد عالم صائم، وزارتِ داخلہ کے سیکرٹری ابو نعیم اور بنگلہ دیش کرکٹ بورڈ کے چیف ایگزیکٹو نجم الدین نے کیا۔

پاکستان کے ہائی کمشنر برائے بنگلہ دیش عمران حیدر بھی اس موقع پر موجود تھے۔

دورے کے دوران محسن نقوی کی بنگلہ دیش کرکٹ بورڈ کے قائم مقام صدر تمیم اقبال سے ملاقات کا بھی امکان ہے۔

ذرائع کے مطابق ان ملاقاتوں میں آئندہ سال شیڈول ایشیا کپ کی تیاریوں اور انتظامات پر بھی گفتگو متوقع ہے۔

پی سی بی چیئرمین کی حیثیت کے علاوہ محسن نقوی ایشین کرکٹ کونسل کے صدر کے طور پر بھی ملاقاتیں کریں گے، جبکہ اے سی سی کے متعدد رکن ممالک کے نمائندوں کی ڈھاکہ میں ہونے والی مشاورت میں شرکت بھی متوقع ہے۔