نظرثانی شدہ فریم ورک میں ادارہ جاتی فنانسنگ، پبلک پرائیویٹ پارٹنرشپس، بیرونِ ملک مقیم پاکستانیوں کی شمولیت اور نان بینکنگ مالیاتی اداروں کی شرکت شامل ہے تاکہ پروگرام کے اہداف حاصل کیے جا سکیں۔

ای سی سی کا اجلاس آج فنانس ڈویژن میں وفاقی وزیر خزانہ و محصولات سینیٹر محمد اورنگزیب کی زیر صدارت منعقد ہوا۔

کمیٹی نے وزارتِ صنعت و پیداوار کی جانب سے پیش کردہ سمری کی بھی منظوری دی، جس میں این ای وی پالیسی 2025-30 کے تحت پاکستان ایکسیلیریٹڈ وہیکل الیکٹریفیکیشن پروگرام کے دوسرے مرحلے کے آغاز کی تجویز شامل تھی۔

کمیٹی نے پروگرام کی کارکردگی اور استعمال میں بہتری کے لیے مجوزہ ترامیم کی منظوری دی، جن میں تصدیقی عمل کو بہتر بنانا، رسائی کو وسعت دینا اور تھرڈ پارٹی ویریفکیشن کے نظام کو مزید مضبوط بنانا شامل ہے۔

ای سی سی نے وزارت تعلیم و پیشہ ورانہ تربیت کی جانب سے پیش کردہ سمری کی منظوری دیتے ہوئے فیض احمد فیض کمپلیکس، نارووال کی تعمیر کے لیے 10 کروڑ روپے کی ٹیکنیکل سپلیمنٹری گرانٹ (ٹی ایس جی) کی منظوری دی۔

کمیٹی نے اسی وزارت کی جانب سے اسلام آباد میں دانش اسکول کوری کے لیے 35 کروڑ روپے کی مزید ٹیکنیکل سپلیمنٹری گرانٹ کی بھی منظوری دی تاکہ تعلیمی سرگرمیوں کے آغاز کے بعد آپریشنل اخراجات پورے کیے جا سکیں۔

اسی طرح ای سی سی نے نیشنل ہیریٹیج اینڈ کلچر ڈویژن کی سمری منظور کرتے ہوئے جشنِ آزادی/معرکۂ حق تقاریب 2025 کے اخراجات کے لیے 5 کروڑ 96 لاکھ 24 ہزار روپے کی منظوری دی۔

کمیٹی نے وزارتِ داخلہ و انسدادِ منشیات کی سمری بھی منظور کی، جس کے تحت ڈائریکٹوریٹ جنرل امیگریشن اینڈ پاسپورٹس کے لیے مالی سال 2025-26 میں 2 ارب 50 کروڑ روپے کی ٹیکنیکل سپلیمنٹری گرانٹ دی جائے گی، تاکہ تنخواہوں، پیداواری اخراجات اور واجبات کی ادائیگی سمیت آپریشنل ضروریات پوری کی جا سکیں۔

ای سی سی نے پیٹرولیم ڈویژن کی جانب سے پیش کردہ سمری پر بھی غور کرتے ہوئے نیشنل اسٹیل کمپلیکس لمیٹڈ (این ایس سی ایل) کو اس کی بحالی کے لیے گیس کی فراہمی کی منظوری دے دی۔ کمیٹی نے ہدایت کی کہ گیس کی دستیابی سے مشروط، مقررہ ٹیرف پر عملدرآمد کے ساتھ صنعتی عمل اور کیپٹو پاور جنریشن کے لیے گیس فراہم کی جائے۔

مزید برآں، ای سی سی نے پیٹرولیم ڈویژن کو ہدایت دی کہ اس نوعیت کی منظوریوں کے لیے ایک یکساں پالیسی اختیار کی جائے۔

کاپی رائٹ بزنس ریکارڈر، 2026