پانچ بار کی چیمپئن ممبئی کے لیے یہ سیزن کسی ڈراؤنے خواب سے کم نہیں جہاں وہ آٹھ میں سے صرف دو میچ جیت کر پوائنٹس ٹیبل پر نویں نمبر پر ہے۔

جسپریت بمراہ جیسے مایہ ناز کھلاڑی کی موجودگی کے باوجود ممبئی کا بولنگ یونٹ بے بس نظر آ رہا ہے۔ سن رائزرز حیدرآباد کے خلاف 243 رنز کا بڑا ہدف بھی مخالف ٹیم نے 8 گیندیں قبل ہی باآسانی حاصل کر لیا۔ دنیا کے بہترین فاسٹ بولر مانے جانے والے بمراہ 4 اوورز میں 54 رنز دے کر کوئی وکٹ نہ لے سکے اور سیزن کے 8 میچوں میں ان کی وکٹوں کی تعداد صرف دو ہے۔

میچ کے بعد گفتگو کرتے ہوئے پانڈیا نے کہا کہ میں اپنے بولرز کو قربانی کا بکرا نہیں بناؤں گا۔ بحیثیت یونٹ ہم وہ کارکردگی نہیں دکھا پا رہے جس کے لیے ممبئی انڈینز جانی جاتی ہے۔انہوں نے مزید کہا کہ ٹیم کو قسمت کے ساتھ کی ضرورت ہے، اگر ہم ملے ہوئے مواقعوں سے فائدہ اٹھائیں تو مومنٹم بدل سکتا ہے۔