لسٹڈ فارماسیوٹیکل کمپنی نے جمعرات کو پاکستان اسٹاک ایکسچینج (پی ایس ایکس) کو بھیجے گئے ایک نوٹس میں اس پیش رفت سے آگاہ کیا۔

نوٹس کے مطابق اے جی پی لمیٹڈ کے بورڈ آف ڈائریکٹرز نے 29 اپریل 2026 کو ہونے والے اپنے اجلاس میں اپنی ایک ایسوسی ایٹڈ کمپنی کے ساتھ معاہدہ کرنے کی منظوری دی جس کے تحت کمپنی دوا ویاگرا کے لیے کنٹریکٹ مینوفیکچرنگ اور مارکیٹنگ کی خدمات انجام دے گی۔

مجوزہ معاہدے کے تحت اے جی پی لمیٹڈ اس پراڈکٹ کے لیے کنٹریکٹ مینوفیکچرنگ آرگنائزیشن (سی ایم او) کا کردار ادا کرے گی اور اسے پاکستان میں اس پراڈکٹ کی کمرشلائزیشن اور تشہیر کے لیے مارکیٹنگ حقوق بھی حاصل ہوں گے۔

مزید کہا گیا کہ فریقین کے درمیان ضروری معاہدوں کو حتمی شکل دی جا رہی ہے اور تمام ضابطے کی کارروائیاں مکمل ہونے کی صورت میں مئی 2026 کے دوران پروڈکٹ مارکیٹ میں لانچ کیے جانے کی توقع ہے۔

اے جی پی لمیٹڈ سال 2014 میں بطور پبلک لمیٹڈ کمپنی پاکستان میں رجسٹرڈ ہوئی تھی۔ کمپنی مختلف اقسام کی دوا ساز مصنوعات کی درآمد، برآمد، مارکیٹنگ، ڈسٹری بیوشن، ڈیلرشپ اور تیاری کے شعبوں سے وابستہ ہے۔

ایٹکن اسٹوارٹ پاکستان (پرائیویٹ) لمیٹڈ (پیرنٹ کمپنی) کمپنی کے حصص کے سرمائے کا 55.80 فیصد حصہ رکھتی ہے جبکہ سنگاپور کی ویسٹ اینڈ 16 پی ٹی ای لمیٹڈ اس کی الٹیمیٹ پیرنٹ کمپنی ہے۔

اے جی پی اپنی مصنوعات ملر اینڈ فپس پاکستان (پرائیویٹ) لمیٹڈ کے ذریعے تقسیم کرتی ہے جس کی رسائی پاکستان بھر میں 46,000 سے زائد فارمیسیوں تک ہے۔

اس خبر کی فائلنگ کے وقت اے جی پی لمیٹڈ کے حصص کی قیمت 179 روپے پر ٹریڈ ہو رہی تھی جس میں 3.24 روپے یا 1.78 فیصد کی کمی دیکھی گئی۔