اسپاٹ گولڈ کی قیمت 0.6 فیصد اضافے کے ساتھ 4,566.73 ڈالر فی اونس تک پہنچ گئی، جبکہ گزشتہ سیشن میں یہ 31 مارچ کے بعد کم ترین سطح پر آ گئی تھی۔ اسی طرح جون ڈیلیوری کے لیے امریکی گولڈ فیوچرز 0.4 فیصد اضافے کے ساتھ 4,578.50 ڈالر پر پہنچ گئے۔

امریکی ڈالر کی قدر میں کمی کے باعث دیگر کرنسی رکھنے والے سرمایہ کاروں کے لیے سونا سستا ہو گیا، جس سے طلب میں اضافہ ہوا۔ دوسری جانب برینٹ خام تیل کی قیمت 119 ڈالر فی بیرل سے اوپر برقرار رہی، کیونکہ امریکا اور ایران کے درمیان مذاکرات تعطل کا شکار ہیں، جس سے مشرقِ وسطیٰ سے تیل کی سپلائی متاثر ہونے کے خدشات بڑھ گئے ہیں۔

امریکی صدر ڈونلڈ ٹرمپ نے تیل کمپنیوں کے ساتھ ممکنہ امریکی ناکہ بندی کے اثرات پر بات چیت کی، جبکہ ایران پر زور دیا کہ جلد کسی معاہدے تک پہنچے۔ ادھر فیڈرل ریزرو نے شرح سود کو برقرار رکھا، تاہم مہنگائی سے متعلق خدشات میں اضافے کی نشاندہی کی، جس سے پالیسی سازوں میں اختلاف بھی سامنے آیا۔

ورلڈ گولڈ کونسل کے مطابق 2026 کی پہلی سہ ماہی میں عالمی سطح پر سونے کی طلب میں 2 فیصد اضافہ ہوا، جو 1,230.9 میٹرک ٹن تک پہنچ گئی۔ سونے کی بارز اور سکوں کی خریداری میں اضافے اور مرکزی بینکوں کی جانب سے 3 فیصد زیادہ خریداری نے زیورات کی طلب میں 23 فیصد کمی کے اثرات کو زائل کر دیا۔

دیگر قیمتی دھاتوں میں چاندی کی قیمت 1 فیصد اضافے کے ساتھ 72.18 ڈالر فی اونس، پلاٹینم 1.7 فیصد اضافے کے ساتھ 1,911 ڈالر، جبکہ پیلیڈیم 0.9 فیصد اضافے کے ساتھ 1,470.40 ڈالر فی اونس ہو گیا۔