اسحاق ڈار نے زور دیا کہ اسلام آباد خطے میں تعمیری رابطے اور کشیدگی میں کمی کے لیے اپنی کوششیں جاری رکھے گا۔

ڈپٹی وزیراعظم و وزیر خارجہ سینیٹر محمد اسحق ڈار نے آج خطے میں تازہ ترین پیش رفت کا جائزہ لینے کے لیے ایک اجلاس کی صدارت کی۔ انہوں نے دہرایا کہ پاکستان ایران اور امریکہ کے درمیان مذاکرات کی سہولت کاری کر رہا ہے تاکہ خطے اور اس سے باہر امن و استحکام کو فروغ دیا جا سکے۔ پاکستان اس سلسلے میں اپنی کوششیں جاری رکھے گا۔

وزارت خارجہ کے بیان کے مطابق، ” اسحاق ڈار نے یہ بھی واضح کیا کہ ایران اور امریکہ کے درمیان سہولت کاری سے متعلق پاکستان کی سرکاری پالیسی صرف وہی بیانات ہیں جو سرکاری ذرائع سے جاری کیے جائیں۔ نام نہ ظاہر کرنے والے حکام یا ذرائع، چاہے پرنٹ یا سوشل میڈیا میں حوالے دیے جائیں، پاکستان کی سرکاری پوزیشن کی نمائندگی نہیں کرتے۔ انہوں نے پرنٹ اور الیکٹرانک میڈیا کو مشورہ دیا کہ قیاس آرائی پر مبنی رپورٹنگ سے گریز کریں اور صرف سرکاری بیانات پر توجہ مرکوز رکھیں۔“

امریکہ اور ایران کے درمیان تعطل کا شکار مذاکرات میں پیش رفت کی امید کے درمیان، ایرانی وزیر خارجہ عباس عراقچی کی قیادت میں وفد امن مذاکرات کے دوسرے دور سے قبل جمعہ کی رات اسلام آباد پہنچ گیا ہے۔

دورے کے دوران ایرانی وزیر خارجہ پاکستان کی اعلیٰ قیادت سے ملاقاتیں کریں گے، جن میں خطے کی تازہ ترین صورتحال اور علاقائی امن و استحکام کے لیے جاری کوششوں پر تبادلہ خیال کیا جائے گا۔

ایک اہلکار نے ایرانی وفد کے اس دورے کو امریکہ کے ساتھ براہِ راست مذاکرات کی بحالی کی جانب ایک اہم قدم قرار دیا، جس کا مقصد ہفتوں سے جاری تنازع کو ختم کرنا ہے۔