پریس ٹی وی کی رپورٹ کے مطابق ایرانی وزیر خارجہ عباس عراقچی نے اسلام آباد میں چیف آف آرمی اسٹاف جنرل عاصم منیر سے ملاقات کی جس میں مشرق وسطی کی صورتحال پر تبادلہ خیال کیا گیا۔

پریس ٹی وی کی رپورٹ کے مطابق ایرانی سرکاری میڈیا نے اس ملاقات کی ایک ویڈیو بھی جاری کی جس میں ایرانی اور پاکستانی وفود نے شرکت کی۔ ان وفود میں ایران کے ترجمان اسماعیل بقائی اور پاکستان کے وزیر داخلہ محسن نقوی بھی شامل تھے۔

ایرانی وزیر خارجہ عباس عراقچی جمعہ کی شب اسلام آباد پہنچے تھے تاکہ پاکستان کی اعلیٰ قیادت کے ساتھ خطے کی بدلتی صورتحال اور امن و استحکام کے فروغ کے لیے جاری سفارتی کوششوں پر بات چیت کرسکیں۔

ترجمان دفترِ خارجہ طاہر اندرا بی نے اس سے قبل بتایا تھا کہ عباس عراقچی اس دورے کے دوران وفد کی قیادت کر رہے ہیں اور ان کی سینئر پاکستانی قیادت سے ملاقاتیں طے ہیں جن میں علاقائی صورتحال اور امن کی کوششوں پر تبادلہ خیال کیا جائے گا۔

اسلام آباد پہنچنے پر نائب وزیراعظم اور وزیر خارجہ اسحاق ڈار، فیلڈ مارشل سید عاصم منیر اور دیگر اعلیٰ حکام نے ان کا استقبال کیا۔

یہ دورہ خطے میں بڑھتی ہوئی کشیدگی اور پاکستان و ایران کے درمیان امن و استحکام کے فروغ کے لیے جاری سفارتی رابطوں کے تناظر میں ہو رہا ہے۔