رپورٹس کے مطابق آبنائے ہرمز میں ایران کی جانب سے دو بحری جہازوں کی تحویل اور امریکی بحری ناکہ بندی کے تسلسل کے بعد خطے میں کشیدگی مزید بڑھ گئی ہے۔ امریکی صدر ڈونلڈ ٹرمپ کی جانب سے ایران کے ساتھ جنگ بندی میں غیر معینہ مدت تک توسیع کے باوجود امن مذاکرات کی بحالی کے کوئی آثار نظر نہیں آ رہے۔

اس صورتحال کے باعث یورو کی قدر 1.1712 ڈالر تک گر گئی، جو اپریل کے وسط کے بعد کم ترین سطح ہے، جبکہ برطانوی پاؤنڈ 1.3497 ڈالر پر رہا۔ آسٹریلوی ڈالر 0.7165 ڈالر اور نیوزی لینڈ ڈالر 0.59045 ڈالر پر مستحکم رہا۔ جاپانی ین کے مقابلے میں امریکی ڈالر معمولی کمی کے ساتھ 159.48 ین پر آ گیا۔

امریکی ڈالر انڈیکس 98.644 پر رہا، جو اپریل کے بعد بلند ترین سطح کے قریب ہے۔ ماہرین کے مطابق توانائی بحران اور مہنگائی کے خدشات کے باعث عالمی معیشت پر دباؤ برقرار ہے، جبکہ فیڈرل ریزرو شرح سود میں فوری کمی سے گریز کرے گا۔

تجزیہ کاروں کا کہنا ہے کہ تیل کی قیمتوں میں اضافہ اور طویل کشیدگی عالمی منڈیوں کے لیے خطرات بڑھا رہی ہے، جبکہ آنے والے معاشی ڈیٹا سے صورتحال مزید واضح ہو گی۔