امریکہ اور اسرائیل کی ایران کے ساتھ جنگ نے عالمی توانائی منڈی میں تاریخ کا سب سے بڑا خلل پیدا کیا، جہاں ایران کی جانب سے بحری راستوں کو خطرات کے باعث آبنائے ہرمز سے گزرنے والی تقریباً 20 فیصد عالمی تیل و گیس سپلائی متاثر ہوئی۔ اس صورتحال میں ایشیا اور یورپ کی ریفائنریوں نے متبادل سپلائی کے لیے امریکہ کا رخ کیا، جو دنیا کا سب سے بڑا تیل پیدا کرنے والا ملک ہے۔

امریکی سرکاری اعداد و شمار کے مطابق گزشتہ ہفتے خالص درآمدات کم ہو کر صرف 66 ہزار بیرل یومیہ رہ گئیں، جبکہ برآمدات بڑھ کر 5.2 ملین بیرل یومیہ کی سات ماہ کی بلند ترین سطح پر پہنچ گئیں۔ آخری بار امریکہ 1943 میں نیٹ ایکسپورٹر تھا۔

رپورٹس کے مطابق تقریباً 47 فیصد امریکی برآمدات یورپ جبکہ 37 فیصد ایشیا کو بھیجی گئیں، جن میں نیدرلینڈز، جاپان، فرانس، جرمنی اور جنوبی کوریا سرفہرست خریدار رہے۔

تاہم ماہرین خبردار کرتے ہیں کہ امریکہ اپنی برآمدی صلاحیت کی حد کے قریب پہنچ چکا ہے، جو تقریباً 6 ملین بیرل یومیہ ہے۔ بڑھتے ہوئے فریٹ اخراجات، محدود ٹینکرز اور پائپ لائن گنجائش مستقبل میں برآمدات کی رفتار کو متاثر کر سکتے ہیں۔

ادھر برینٹ اور ویسٹ ٹیکساس انٹرمیڈیٹ کے درمیان قیمت کا فرق بڑھنے سے امریکی تیل عالمی منڈی میں مزید پرکشش ہو گیا ہے، جس کے باعث طلب میں اضافہ دیکھا جا رہا ہے۔