ترجمان دفتر خارجہ کے مطابق چاروں ممالک کے سینئر حکام کا پہلا اجلاس اسلام آباد میں منعقد ہوا، جس کے دوران باہمی تعاون کے نئے امکانات پر غور کیا گیا۔

اجلاس کے موقع پر اسحاق ڈار نے الگ الگ ملاقاتیں بھی کیں، جن میں موسیٰ کولا کلتقایا، نازیح النگاری اور سعودی عرب کے عبداللہ بن خالد بن سعود آل کبیر آل سعود شامل تھے۔

انہوں نے چاروں ممالک کے درمیان ”قریبی اور برادرانہ تعلقات“ کو سراہتے ہوئے کہا کہ علاقائی اور عالمی امور پر ان کے مؤقف میں نمایاں ہم آہنگی پائی جاتی ہے۔

وزیر خارجہ نے زور دیا کہ امن، خوشحالی اور معاشی ترقی جیسے مشترکہ اہداف کے لیے تعاون کو ایک مشترکہ اور ادارہ جاتی فریم ورک کے ذریعے منظم شکل دی جانی چاہیے۔

سعودی عرب، ترکیہ اور مصر کے سینئر سفارت کار اس وقت پاکستان کے دورے پر ہیں اور اسلام آباد میں ہونے والے اجلاس میں شرکت کر رہے ہیں، جس کا مقصد باہمی رابطہ کاری کو فروغ دینا اور تعاون کے نئے مواقع تلاش کرنا ہے۔

یہ مذاکرات چاروں ممالک کے درمیان ایک نئے کثیرالجہتی سفارتی رابطہ فریم ورک کے آغاز کی نشاندہی کرتے ہیں، جہاں حکام سیاسی، اقتصادی اور تزویراتی تعاون کے مختلف پہلوؤں پر غور کریں گے۔