رپورٹ کے مطابق فریقین کے درمیان بات چیت کا سلسلہ جاری ہے، تاہم ایران نے اسے ”امریکی حد سے زیادہ مطالبات“ قرار دیا ہے، جبکہ تہران اپنے عسکری فوائد کو برقرار رکھنے پر اصرار کر رہا ہے۔

ایرانی سرکاری ٹی وی نے اسلام آباد میں جاری مذاکرات کے دوران رپورٹ کیا ہے کہ پاکستان میں ایرانی اور امریکی حکام کے درمیان مذاکرات کے دو دور ہو چکے ہیں، جبکہ تیسرا دور ہفتے کی رات یا اتوار کو متوقع ہے۔

ریاستی ٹی وی کے ایک نامعلوم ذریعے کے مطابق، جو مذاکراتی ٹیم کے قریب بتایا جاتا ہے، ”ان مذاکرات کا ایک اور دور آج رات یا کل ہونے کا امکان ہے۔“

وائٹ ہاؤس کے ایک سینئر عہدیدار نے ہفتے کے روز بتایا ہے کہ پاکستان کی میزبانی میں ایران اور امریکہ کے درمیان سہ فریقی براہِ راست مذاکرات ہو رہے ہیں، جو حالیہ عرصے میں اس عمل سے ایک مختلف پیش رفت ہے، کیونکہ اس سے قبل دونوں فریق ثالث کے ذریعے الگ الگ کمروں میں بات چیت کرتے رہے ہیں۔

ایرانی سرکاری ٹی وی کے نمائندے کے مطابق تیسرے دور کے مذاکرات کا منصوبہ موجود ہے، جو پاکستان کی ثالثی میں جنگ کے خاتمے کی کوششوں کا حصہ ہیں۔ نمائندے نے کہا، ”ہم دیکھ رہے ہیں کہ آیا یہ (تیسرا دور) ہوتا ہے یا نہیں۔“

ایرانی خبر رساں ایجنسی تسنیم نے رپورٹ کیا ہے کہ اسٹریٹ آف ہرمز کا معاملہ، جس کے ذریعے دنیا کا زیادہ تر خام تیل اور مائع قدرتی گیس گزرتی ہے، مذاکرات میں ”سنگین اختلاف“ کے اہم نکات میں شامل ہے۔

وائٹ ہاؤس کے مطابق ہفتے کی شام اسلام آباد میں ایران اور پاکستان کے ساتھ اعلیٰ سطح کے سہ فریقی براہِ راست مذاکرات جاری تھے، اور بات چیت کا سلسلہ بدستور جاری ہے۔

امریکہ اور ایران کے درمیان براہِ راست مذاکرات کا آغاز ہفتے کے روز اسلام آباد میں ہوا، جو دونوں ممالک کے درمیان ایک غیر معمولی سفارتی پیش رفت قرار دی جا رہی ہے۔

پی ٹی وی نے ایکس (X) پر اپنی پوسٹ میں لکھا ہے کہ اسلام آباد میں ایران اور امریکہ کے درمیان ”تاریخی امن مذاکرات“ کا آغاز ہو گیا ہے، جہاں دونوں فریق بڑھتی ہوئی کشیدگی کے بعد پہلی بار آمنے سامنے بیٹھے ہیں۔

پی ٹی وی کے مطابق اعلیٰ سطح کے وفود کی آمد، پاکستان کی مؤثر سفارت کاری اور عالمی رہنماؤں کے مثبت بیانات نے خطے میں جنگ بندی اور پائیدار امن کی امیدوں کو تقویت دی ہے، جبکہ دنیا ان اہم مذاکرات کے نتائج پر گہری نظر رکھے ہوئے ہے۔

ایرانی پریس ٹی وی نے بھی اسلام آباد میں ایرانی اور امریکی وفود کے درمیان براہِ راست مذاکرات کی تصدیق کی ہے۔

وزیراعظم شہباز شریف نے ہفتے کے روز امریکہ اور ایران کے وفود کے ساتھ الگ الگ ملاقاتیں کیں اور امید ظاہر کی کہ ”اسلام آباد مذاکرات“ مشرقِ وسطیٰ میں دیرپا امن کی راہ ہموار کریں گے۔

یہ ملاقاتیں ایسے وقت میں ہوئیں جب سخت سکیورٹی میں اسلام آباد مذاکرات کا آغاز ہوا، اور امریکہ و ایران کے اعلیٰ سطح کے رہنما چھ ہفتے سے جاری جنگ کے خاتمے کے لیے پاکستان پہنچے۔

دوسری جانب ایران کے صدر مسعود پزشکیان نے کہا ہے کہ ان کی حکومت ایرانی عوام کے ساتھ مضبوطی سے کھڑی رہے گی اور مذاکرات ”جرأت“ کے ساتھ کیے جائیں گے۔

انہوں نے ایکس (X) پر لکھا کہ پاکستان پہنچنے والا اعلیٰ سطح کے ایرانی وفد پوری قوت کے ساتھ ایران کے مفادات کا محافظ ہے اور اسی تناظر میں وہ جرات مندانہ انداز میں مذاکرات کرے گا۔ ان کے مطابق، عوام کی خدمت کسی لمحے بھی نہیں رکے گی، اور مذاکرات کے کسی بھی نتیجے کے باوجود حکومت عوام کے ساتھ مضبوطی سے کھڑی رہے گی۔

یہ 1979 کے اسلامی انقلاب کے بعد امریکہ اور ایران کے درمیان ہونے والے اعلیٰ ترین سطح کے مذاکرات ہیں، اور 2015 کے بعد پہلی بار دونوں فریق براہِ راست آمنے سامنے آ کر باضابطہ بات چیت کر رہے ہیں، جب ایران کے جوہری پروگرام پر معاہدہ طے پایا تھا۔

امریکی نائب صدر جے ڈی وینس کی قیادت میں وفد کے ساتھ ملاقات میں وزیراعظم شہباز شریف نے امید ظاہر کی کہ ”اسلام آباد مذاکرات“ خطے میں دیرپا امن کی جانب ایک اہم سنگِ میل ثابت ہوں گے۔

امریکی وفد میں صدر ڈونلڈ ٹرمپ کے خصوصی ایلچی اسٹیو وٹکوف اور داماد جیرڈ کشنر بھی شامل تھے۔

وزیراعظم کے ہمراہ نائب وزیراعظم و وزیر خارجہ محمد اسحاق ڈار اور وزیر داخلہ محسن رضا نقوی موجود تھے۔

وینس کے ساتھ ملاقات میں وزیراعظم نے دونوں وفود کے تعمیری انداز میں مذاکرات میں حصہ لینے کو سراہا۔

انہوں نے کہا کہ پاکستان دونوں فریقین کو سہولت فراہم کرنے کے عمل کو جاری رکھے گا تاکہ خطے میں پائیدار امن کی طرف پیش رفت ہو سکے۔

دوسری جانب ایرانی وفد، جس کی قیادت ایرانی پارلیمان (مجلس شوریٰ اسلامی) کے اسپیکر محمد باقر قالیباف نے کی اور جس میں وزیر خارجہ عباس عراقچی بھی شامل تھے، نے بھی وزیراعظم شہباز شریف سے ملاقات کی۔

اسلام آباد مذاکرات میں ایران کی شمولیت کو سراہتے ہوئے وزیراعظم نے پاکستان کے مخلصانہ عزم کا اعادہ کیا کہ وہ ثالث کے طور پر اپنا کردار جاری رکھے گا تاکہ خطے اور عالمی امن و استحکام کے مفاد میں بامعنی نتائج کی جانب پیش رفت کے لیے رفتار پیدا کی جا سکے۔

پاکستان کی جانب سے ملاقات میں نائب وزیراعظم اسحاق ڈار، چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر اور وزیر داخلہ محسن نقوی بھی شریک تھے۔