انہوں نے اپنی پوسٹ میں کہا ہے کہ ’’ہم نے آبنائے ہرمز کو صاف کرنے کا عمل شروع کر دیا ہے‘‘ اور یہ بھی دعویٰ کیا کہ ایران کے ’’تمام 28 مائن بچھانے والے جہاز سمندر کی تہہ میں پہنچ چکے ہیں۔‘‘

ٹرمپ اس سے قبل بھی یہ دعویٰ کر چکے ہیں کہ امریکی افواج نے ایران کی بحریہ اور فضائیہ کو تباہ کرتے ہوئے اس کے بیلسٹک میزائل اور جوہری پروگرام کو شدید نقصان پہنچایا ہے۔

تاہم گزشتہ چند ہفتوں کے دوران ایرانی حملوں کے خدشے نے آبنائے ہرمز کو عملاً بند کر دیا ہے، جو عالمی تیل کی ترسیل کی ایک انتہائی اہم گزرگاہ ہے۔ اس آبی راستے کی بندش یا محدود فعالیت نے عالمی توانائی منڈیوں کو شدید متاثر کیا ہے۔

اگرچہ اس راستے سے گزرنے والا زیادہ تر تیل براہِ راست امریکہ کو نہیں جاتا، اس کے باوجود امریکی پٹرول کی قیمتوں میں اضافہ دیکھا گیا ہے۔

دوسری جانب پاکستان کی میزبانی میں اسلام آباد میں ہفتے کے روز امریکہ اور ایران کے درمیان مذاکرات کا آغاز ہوا، جو جاری اور نازک جنگ بندی کے پس منظر میں ہو رہے ہیں۔