اجلاس میں قبضہ مافیا اور اراضی واگزاری سے متعلق 21 کیسز کا پوائنٹ ٹو پوائنٹ جائزہ لیا گیا اور ضروری ہدایات جاری کی گئیں اجلاس کو بتایا گیا کہ 21 کیسز میں سے 6 کیسز حل کیے جا چکے ہیں۔

اجلاس میں تجاوزات اور زمینوں پر غیر قانونی قبضوں کے خلاف جاری اقدامات کا تفصیلی جائزہ لیا گیا جبکہ کاروباری برادری کو درپیش مسائل کے حل کے لیے مختلف تجاویز بھی زیر غور آئیں۔

وزیر داخلہ سندھ نے ہدایت کی کہ شہر میں شکایات کے مرتکب لینڈ مافیا کے خلاف جاری کارروائیوں کو مزید تیز کیا جائے اور قبضہ مافیا کے خلاف بلاامتیاز اور مؤثر آپریشن ہر سطح پر یقینی بنایا جائے۔ انہوں نے کمشنر کراچی کو ہدایت کی کہ تحریری شکایات پر کسی قسم کی تاخیر نہ کی جائے اور فوری طور پر ان کا جائزہ لیا جائے۔

مزید برآں سرکاری ونجی زمینوں پر غیر قانونی قبضوں کےخاتمے کیلیے واضح ٹاسکنگ کی جائے اور قانون نافذ کرنے والے اداروں کو مزید متحرک بنایا جائے۔

وزیر داخلہ سندھ نے زور دیا کہ لینڈ گریبنگ اور قبضہ مافیا کے خلاف آپریشن، اراضی واگذاری میں شفافیت،احتساب اور ادارہ جاتی ہم آہنگی کو ہر صورت یقینی بنایا جائے۔

انہوں نے کہا کہ شہریوں کی شکایات کے فوری ازالے کے لیے مؤثر میکنزم ناگزیر ہے اور اجلاس کے فیصلوں پر عملدرآمد کے لیے واضح لائحہ عمل ترتیب دیا جائے۔

کمشنر کراچی نے اجلاس کو بریفنگ دیتے ہوئے کہا کہ قبضہ مافیا کے خلاف جاری آپریشنز کی مسلسل مانیٹرنگ کی جا رہی ہے اور اس حوالے سے باقاعدگی سے اجلاس منعقد کیے جا رہے ہیں۔

انہوں نے بتایا کہ تمام ضلعی انتظامیہ انسدادِ تجاوزات مہم میں مزید متحرک ہے اور شہر میں سرکاری اراضی کا تحفظ ہر صورت یقینی بنایا جائے گا۔ متعلقہ افسران کو ہدایت کی گئی ہے کہ قبضوں کے خاتمے میں کسی قسم کی غفلت برداشت نہیں کی جائے گی۔

آئی جی سندھ جاوید عالم اوڈھو نے کہا کہ لینڈ مافیا اور قبضہ گروپوں کے خلاف پولیس کارروائیوں کو مزید مؤثر بنایا جا رہا ہے۔ تمام فیلڈ افسران کو ہدایت دی گئی ہے کہ قبضہ مافیا کے خلاف بلاامتیاز قانونی کارروائی یقینی بنائی جائے۔

انہوں نے مزید کہا کہ پولیس اور ضلعی انتظامیہ کے درمیان کوآرڈینیشن کو مزید مضبوط بنایا جائے گا جبکہ پولیس، کمشنر کراچی اور تاجر برادری کے درمیان قریبی رابطہ برقرار ہے۔

اجلاس میں کمشنر کراچی,سیکریٹری داخلہ سندھ اقبال میمن،آئی جی سندھ جاوید عالم اوڈھو، اینٹی کرپشن اور ہوم ڈپارٹمنٹ کے نمائندگان،کاروباری برادری کے نمائندے، چیئرمین آباد،صدر کے سی سی آئی،ایف پی سی سی آئی کی اینٹی کرپشن کمیٹی کے ارکان سمیت دیگر اعلیٰ حکام نے شرکت کی۔

تاجر برادری نے اجلاس کے انعقاد اور اس کے اغراض و مقاصد پر اطمینان کا اظہار کرتے ہوئے کہا کہ کاروباری طبقے کو درپیش مسائل اور شکایات پر بروقت ردعمل اور پولیس کی معاونت قابلِ ستائش ہے۔ انہوں نے کہا کہ قیامِ امن اور مفاد عامہ کے اقدامات میں وہ حکومت کے ساتھ ہیں۔