ماہرین کے مطابق سرمایہ کار امریکی ڈالر میں اپنی پوزیشنز کم کر رہے ہیں، جو جنگ کے دوران محفوظ سرمایہ سمجھا جاتا تھا، تاہم اب کشیدگی میں کمی کے باعث ڈالر کی طلب کم ہو رہی ہے۔ ڈالر انڈیکس اس ہفتے اب تک 1.3 فیصد کم ہو چکا ہے۔

یورو، آسٹریلوی ڈالر اور نیوزی لینڈ ڈالر سمیت کئی بڑی کرنسیوں میں نمایاں اضافہ دیکھا گیا ہے، جبکہ برطانوی پاؤنڈ بھی مضبوط ہوا ہے۔ جاپانی ین اگرچہ اب بھی دباؤ میں ہے مگر حالیہ کم ترین سطح سے کچھ بحالی دکھا رہا ہے۔

تجزیہ کاروں کے مطابق اگر امریکہ اور ایران کے درمیان پاکستان میں ہونے والے مذاکرات مثبت رہے تو ڈالر مزید کمزور ہو سکتا ہے، تاہم ناکامی کی صورت میں مارکیٹ میں دوبارہ اتار چڑھاؤ کا امکان ہے۔

ادھر چینی یوآن بھی مضبوط ہوا ہے اور 2023 کے بعد اپنی بلند ترین سطح کے قریب ٹریڈ کر رہا ہے، جسے عالمی غیر یقینی صورتحال میں نسبتاً مستحکم کرنسی کے طور پر دیکھا جا رہا ہے۔