کاروبار کے اختتام پر ڈالر کے مقابلے میں روپیہ ایک پیسے کی بہتری سے 279.05 روپے پر بند ہوا۔

یاد رہے کہ منگل کو مقامی کرنسی 279.06 روپے پر بند ہوئی تھی۔

دریں اثنا بدھ کو ایشیائی تجارتی سیشن کے دوران امریکی ڈالر کی قدر ایک ماہ کی کم ترین سطح پر آ گئی جبکہ یورو، ین، آسٹریلوی اور نیوزی لینڈ ڈالر (کیوی) کی قدر میں تیزی سے اضافہ ہوا۔ یہ صورتحال امریکی صدر ڈونلڈ ٹرمپ کے اس بیان کے بعد سامنے آئی جس میں انہوں نے ایران کے ساتھ دو ہفتوں کی جنگ بندی پر آمادگی ظاہر کی تھی۔

گرین بیک (امریکی ڈالر) کے مقابلے میں ین کی قدر میں 0.7 فیصد اضافہ ہوا اور یہ 158.50 فی ڈالر کی سطح پر آگیا۔ یورو 0.7 فیصد اضافے کے ساتھ 1.1677 ڈالر پر پہنچ گیا جبکہ برطانوی پاؤنڈ کی قدر 0.8 فیصد اضافے کے ساتھ 1.3403 ڈالر ہوگئی۔

آسٹریلوی ڈالر 1.2 فیصد اضافے کے ساتھ 0.7063 ڈالر پر پہنچ گیا اور نیوزی لینڈ کا کیوی ڈالر 1.1 فیصد کی چھلانگ لگا کر 0.5795 ڈالر کی سطح پر آگیا۔

امریکی ڈالر انڈیکس مسلسل تیسرے دن گراوٹ کا شکار ہو کر 98.943 کی سطح پر آ گیا، جو 11 مارچ کے بعد اس کی کم ترین سطح ہے۔

کرپٹو کرنسیوں کی قدر میں بھی اضافہ دیکھا گیا، جس میں بٹ کوائن 3.2 فیصد اضافے کے ساتھ 71,514.03 ڈالر اور ایتھر 5.7 فیصد اضافے کے ساتھ 2,235.35 ڈالر پر پہنچ گیا۔

مزید برآں بدھ کو خام تیل کی قیمتیں 100 ڈالر فی بیرل سے نیچے گر گئیں۔