بارسلونا کے قریب واقع آر سی ڈی ای اسٹیڈیم میں ورلڈ کپ کی تیاری کے سلسلے میں کھیلے گئے اس میچ کے دوران ہسپانوی شائقین نے جو نہیں اچھلتا وہ مسلمان ہے جیسے توہین آمیز نعرے لگائے۔ یہ میچ بغیر کسی گول کے برابر رہا تھا۔ فیفا نے اپنے بیان میں کہا کہ دوستانہ میچ کے دوران پیش آنے والے ان واقعات پر ہسپانوی فٹ بال حکام کے خلاف کارروائی شروع کر دی گئی ہے۔

ہسپانوی پولیس نے بھی گزشتہ ہفتے ان نعروں کی تحقیقات شروع کر دی تھیں۔ اسپین کے اسٹار ونگر لیمین یامال نے بھی انسٹاگرام پر ان نعروں کی مذمت کرتے ہوئے انہیں ناقابلِ برداشت قرار دیا ہے۔

دوسری جانب مصری فٹ بال ایسوسی ایشن نے ان واقعات کو نسل پرستی کا گھناؤنا فعل قرار دیتے ہوئے اس کی شدید مذمت کی ہے، تاہم یہ بھی واضح کیا کہ تماشائیوں کے ایک چھوٹے سے گروہ کی ان حرکتوں سے دونوں ممالک کی فیڈریشنز کے قریبی تعلقات متاثر نہیں ہوں گے۔