ان اصلاحات کا مقصد برآمدی آمدنی کے طریقہ کار کو آسان بنانا، دستاویزات کی ضروریات کو یکساں کرنا، لین دین کی پروسیسنگ کے لیے وقت کی حد مقرر کرنا اور شکایات کے ازالے کے نظام کو بہتر بنانا ہے۔

نئے سہولتی اقدامات کے مطابق آئی ٹی کمپنیاں اور فری لانسرز کو ہر برآمدی لین دین کے لیے فارم آر جمع کرانے کی ضرورت نہیں ہوگی۔ اس کے بجائے وہ ایک بار کا ڈیکلریشن جمع کرائیں گے جس میں بیرون ملک فراہم کی جانے والی خدمات کی نوعیت واضح کی جائے گی، اور یہ عمل نئے اکاؤنٹ کھولنے کے وقت کیا جائے گا جبکہ موجودہ صارفین کے لیے ضرورت کے مطابق ہوگا۔

مجاز بینکرز کو ہدایت دی گئی ہے کہ وہ ایکسپورٹرز کے اکاؤنٹس کے ساتھ متعلقہ سروس اور پرپز کوڈ منسلک کریں تاکہ برآمدی لین دین کی رپورٹنگ اور پروسیسنگ آسان ہو سکے، جب تک ایکسپورٹر کی جانب سے کوئی اور ہدایت نہ دی جائے۔

مزید یہ کہ بیرون ملک سے آنے والی برآمدی رقوم اور ایکسپورٹرز کے اسپیشل فارن کرنسی اکاؤنٹس سے بیرون ملک ادائیگیوں کی پروسیسنگ کے لیے زیادہ سے زیادہ ایک ورکنگ ڈے کا وقت مقرر کیا گیا ہے۔

اس کے علاوہ اسپیشل فارن کرنسی اکاؤنٹس سے بیرون ملک خدمات حاصل کرنے کے لیے ادائیگیوں کی دستاویزی ضروریات کو بھی معیاری بنایا گیا ہے تاکہ بینکنگ نظام میں شفافیت اور یکسانیت پیدا ہو سکے۔

اسٹیٹ بینک نے بینکوں کو ہدایت کی ہے کہ وہ اندرونی سطح پر ایسے موثر نظام قائم کریں جو آئی ٹی کمپنیوں اور فری لانسرز کی شکایات کا بروقت ازالہ یقینی بنائیں۔

ان اقدامات کے ساتھ ساتھ خدمات کی برآمد اور درآمد سے متعلق رپورٹنگ کے نظام کو بھی آسان بنایا گیا ہے، جس کے لیے فارم آر، انورڈ ریمیٹینس واؤچر اور فارم ایم میں ترامیم کی گئی ہیں۔

فارم آر حاصل کرنے کی حد بڑھا کر 25 ہزار امریکی ڈالر یا اس کے مساوی کرنسی کر دی گئی ہے، جس سے زیادہ تر صارفین کو سہولت ملے گی۔

مزید یہ کہ بینکوں کو ہدایت دی گئی ہے کہ وہ فارم آر اور فارم ایم کو ڈیجیٹلائز کریں اور صارف کے بنیادی ڈیٹا کو خودکار طریقے سے شامل کرنے کی سہولت فراہم کریں تاکہ کاروبار میں آسانی کو فروغ دیا جا سکے۔

اسٹیٹ بینک کا کہنا ہے کہ یہ اقدامات آپریشنل کارکردگی میں نمایاں بہتری لائیں گے اور پاکستان کی آئی ٹی برآمدات کی ترقی میں اہم کردار ادا کریں گے۔

فارن ایکسچینج مینوئل کی متعلقہ شقوں کے تحت بینکوں کو ہدایت دی گئی ہے کہ وہ پوشیدہ ادائیگیوں اور وصولیوں سے متعلق ڈیٹا اسٹیٹ بینک کے انٹرنیشنل ٹرانزیکشن رپورٹنگ سسٹم کو فراہم کریں۔

اسٹیٹ بینک نے مزید ہدایت کی ہے کہ تمام بینک فوری طور پر نئے فارمیٹس استعمال کریں اور انورڈ و آؤٹ ورڈ ریمیٹنس کے لیے معلومات کی درست تقسیم کو یقینی بنائیں۔

کاپی رائٹ بزنس ریکارڈر، 2026