اسپاٹ گولڈ کی قیمت 0.9 فیصد کمی کے ساتھ 4,631.69 ڈالر فی اونس تک آ گئی، جبکہ اپریل کے لیے امریکی سونے کے فیوچرز 0.5 فیصد کمی کے ساتھ 4,657.50 ڈالر فی اونس پر ٹریڈ ہوئے۔ مارکیٹ میں کم لیکویڈیٹی بھی دیکھی گئی کیونکہ ایشیا اور یورپ میں کئی بازار تعطیلات کے باعث بند تھے۔

مارکیٹ تجزیہ کار ٹم واٹر کے مطابق حالیہ مضبوط امریکی نان فارم پے رولز کے اعداد و شمار نے مرکزی بینکوں کے سخت مالیاتی موقف کو مزید مضبوط کیا ہے، جبکہ ایران سے متعلق جنگ کے باعث تیل کی قیمتوں میں اضافہ مہنگائی کے خدشات کو بڑھا رہا ہے، جس سے سونے کی محفوظ سرمایہ کاری کی کشش کم ہو رہی ہے۔

امریکی اعداد و شمار کے مطابق مارچ میں 178,000 نئی ملازمتیں پیدا ہوئیں، جبکہ بے روزگاری کی شرح کم ہو کر 4.3 فیصد پر آ گئی۔ اس کے ساتھ 10 سالہ امریکی ٹریژری ییلڈ اور ڈالر انڈیکس میں اضافہ بھی دیکھا گیا، جس نے سونے پر دباؤ بڑھایا۔

دوسری جانب ایران کے ساتھ جاری کشیدگی کے باعث خام تیل کی قیمتوں میں اضافہ جاری ہے، جبکہ امریکی صدر ڈونلڈ ٹرمپ نے دھمکی دی ہے کہ اگر ایران نے آبنائے ہرمز نہ کھولی تو سخت کارروائی کی جائے گی۔ مہنگائی کے خدشات بڑھنے کے باوجود شرح سود بلند رہنے کی توقعات نے سونے جیسے غیر منافع بخش اثاثے کی طلب کو کم کیا ہے۔

چاندی، پلاٹینم اور پیلیڈیم کی قیمتوں میں بھی کمی ریکارڈ کی گئی۔