طبی ذرائع نے بتایا کہ فضائی حملے میں غزہ سٹی کے علاقے دراج کے قریب جافا اسٹریٹ پر لوگوں کے ایک گروپ کو نشانہ بنایا گیا، جس کے نتیجے میں چار افراد شہید اور متعدد زخمی ہوئے۔ اسرائیلی فوج نے فوری طور پر اس واقعے پر کوئی تبصرہ نہیں کیا۔

فلسطینی تنظیم حماس اور اسرائیل ایک دوسرے پر اکتوبر میں ہونے والی جنگ بندی کی خلاف ورزی کا الزام عائد کرتے رہے ہیں، جس نے دو سال سے جاری مکمل جنگ کو روکا تھا۔ غزہ کی وزارت صحت کے مطابق جنگ بندی کے آغاز کے بعد سے اب تک اسرائیلی کارروائیوں میں کم از کم 700 افراد شہید ہو چکے ہیں۔

دوسری جانب حماس کے ایک وفد نے گزشتہ ہفتے قاہرہ میں مصری، قطری اور ترک ثالثوں سے ملاقات کی اور غیر مسلح کرنے کی تجویز پر ابتدائی ردعمل دیا۔ ذرائع کے مطابق حماس نے واضح کیا ہے کہ جب تک اسرائیل مکمل طور پر غزہ سے انخلا کی ضمانت نہیں دیتا، وہ ہتھیار ڈالنے پر بات نہیں کرے گا۔

حماس کے 7 اکتوبر 2023 کے حملوں میں اسرائیلی اعداد و شمار کے مطابق 1200 افراد ہلاک ہوئے تھے، جبکہ اس کے بعد اسرائیلی کارروائیوں میں 72 ہزار سے زائد فلسطینی شہید ہو چکے ہیں۔