سرکاری بیان کے مطابق، وزیر اعظم نے ایسٹر کے موقع پر اپنے پیغام میں پوری قوم کی جانب سے مسیحی برادری کو نیک تمنائیں پیش کیں اور امید ظاہر کی کہ یہ موقع دنیا بھر میں امن، استحکام اور خوشحالی کا باعث بنے گا۔

انہوں نے کہا کہ آج کے چیلنجز کے دور میں تمام مذاہب کا مشترکہ پیغام یعنی امن پہلے سے کہیں زیادہ اہم ہو چکا ہے۔

شہباز شریف نے کہا کہ ایسٹر محبت، امید، قربانی اور معافی کی علامت ہے اور یہ مختلف پس منظر رکھنے والے لوگوں کے درمیان رواداری، بھائی چارے اور خیرسگالی کو فروغ دیتا ہے۔

انہوں نے پاکستان کی مسیحی برادری کی ملک کی سماجی اور معاشی ترقی میں نمایاں خدمات کو سراہا اور مختلف شعبوں میں ان کے فعال کردار کو تسلیم کیا۔

وزیر اعظم نے اس عزم کا اعادہ کیا کہ حکومت تمام شہریوں بالخصوص اقلیتوں کے حقوق کے تحفظ کے لیے پرعزم ہے اور تعلیم، معیشت اور دیگر شعبوں میں مساوی مواقع فراہم کیے جائیں گے۔

انہوں نے کہا کہ یہ عزم اسلامی اصولوں، قائد اعظم محمد علی جناح کے وژن اور آئین پاکستان کی روشنی میں ہے۔

وزیراعظم نے کہا کہ مذہبی ہم آہنگی اور کثیر الثقافتی معاشرہ ملک کی مضبوطی کی بنیاد ہیں۔

انہوں نے قومی ترقی اور خوشحالی کے لیے اتحاد اور مشترکہ کوششوں کی ضرورت پر زور دیا اور آخر میں مسیحی برادری کو پرامن اور خوشگوار ایسٹر کی مبارکباد پیش کی۔