چین جس کی مغربی سرحدیں ان دونوں ممالک سے ملتی ہیں، حلیف سے حریف بننے والے ان پڑوسیوں کے درمیان ثالثی کی کوششیں کررہا ہے، اس سلسلے میں مارچ کے دوران دونوں ممالک کے وزرائے خارجہ کے ساتھ ٹیلی فونک رابطے کیے گئے اور ایک خصوصی ایلچی کو بھی دوروں پر بھیجا گیا۔

وزارتِ خارجہ کی ترجمان ماؤ ننگ نے پریس بریفنگ کے دوران بتایا کہ پاکستان اور افغانستان دونوں چین کی ثالثی کو اہمیت دیتے ہیں اور اسے خوش آئند قرار دیتے ہیں اور وہ دوبارہ مذاکرات کی میز پر بیٹھنے کے لیے تیار ہیں جو کہ ایک مثبت پیش رفت ہے۔

ماؤننگ نے یہ واضح نہیں کیا کہ یہ مذاکرات کہاں ہو رہے ہیں، تاہم دونوں پڑوسی ممالک اس سے قبل یہ کہہ چکے ہیں کہ یہ بات چیت ارومچی میں ہورہی ہے۔

ترجمان ماؤ ننگ نے مزید کہا کہ چین دونوں فریقوں کے ساتھ قریبی رابطے میں رہتے ہوئے مناسب حالات پیدا کرنے اور ایک پلیٹ فارم مہیا کرنے کے لیے ثالثی اور مذاکرات کے فروغ میں مصروف ہے۔ انہوں نے یہ بھی بتایا کہ تینوں ممالک مناسب وقت پر اس حوالے سے مزید معلومات جاری کریں گے۔

اکتوبر سے شروع ہونے والی پاکستان اور افغانستان کے درمیان لڑائی میں دونوں جانب درجنوں افراد مارے جا چکے ہیں جن میں افغان باشندوں کو سب سے زیادہ نقصان اٹھانا پڑا ہے۔ اسلام آباد افغان طالبان پر پاکستان میں حملے کرنے والے دہشت گردوں کو پناہ دینے کا الزام عائد کرتا ہے، تاہم کابل ان الزامات کی تردید کرتے ہوئے عسکریت پسندی کو اپنے پڑوسی ملک کا اندرونی مسئلہ قرار دیتا ہے۔