وزیراعظم نے ان خیالات کا اظہار علاقائی صورتحال کے تناظر میں پیٹرولیم مصنوعات کی سپلائی چین، بچت اور کفایت شعاری کے اقدامات کا جائزہ لینے کے لیے منعقدہ اعلیٰ سطح کے اجلاس کی صدارت کرتے ہوئے کیا۔

وزیراعظم آفس کے مطابق اجلاس میں موجودہ حالات کے تناظر میں کم آمدنی والے طبقات کو ریلیف فراہم کرنے کے اقدامات کا بھی جائزہ لیا گیا۔ وزیراعظم نے متعلقہ وزارتوں کو ہدایت کی کہ وہ صوبوں کے ساتھ مشاورت کے بعد اس سلسلے میں حتمی تجاویز پیش کریں۔ شہباز شریف کا کہنا تھا کہ گزشتہ تین ہفتوں کے دوران وفاقی حکومت نے کم آمدنی والے شعبے کو ریلیف دینے کے لیے اہم اقدامات کیے ہیں اور مستقبل میں بھی ایسے اقدامات جاری رہیں گے۔

انہوں نے مزید کہا کہ تیل کی قیمتوں میں اضافے کو روکنے کے لیے وفاقی حکومت نے مختلف کفایت شعاری کے اقدامات، بچت اور ترقیاتی بجٹ میں کٹوتیوں کے ذریعے عام آدمی کو 129 ارب روپے کا ریلیف فراہم کیا ہے۔ وزیراعظم نے نوٹ کیا کہ وفاقی حکومت کے بروقت فیصلوں کی بدولت قومی ضروریات کو پورا کرنے کے لیے پیٹرولیم مصنوعات کی وافر مقدار دستیاب ہے۔ انہوں نے اس بات پر زور دیا کہ عوام کو ریلیف فراہم کرنا ہماری اولین ترجیح ہے۔

یہ پیش رفت ایک ایسے وقت میں سامنے آئی ہے جب ایک روز قبل وزیراعظم نے صوبائی حکومتوں کو ہدایت کی تھی کہ وہ موٹر سائیکل اور رکشہ مالکان کو اپنی گاڑیاں اپنے نام پر رجسٹر کرانے کے لیے تمام ضروری سہولیات فراہم کریں، تاکہ فیول سپورٹ پروگرام کے ذریعے کم آمدنی والے مسافروں کو عالمی سطح پر تیل کی قیمتوں میں اتار چڑھاؤ سے بچایا جا سکے۔ وزیراعظم کے بقول اس اقدام سے ملک بھر میں موٹر سائیکلوں اور رکشوں کے ڈیٹا کو ڈیجیٹل کرنے میں مدد ملے گی اور مالکان مستقبل میں حکومتی ریلیف اقدامات سے فائدہ اٹھا سکیں گے۔ انہوں نے حکام کو اس سلسلے میں چاروں صوبوں، آزاد کشمیر اور گلگت بلتستان کے چیف سیکرٹریز سے رابطہ کرنے کی ہدایت بھی کی تھی۔

آج کے اجلاس کو کفایت شعاری اور بچت کے اقدامات پر عملدرآمد کی پیش رفت سے متعلق بریفنگ دی گئی۔ مزید بتایا گیا کہ ڈیجیٹل ڈیش بورڈ کے ذریعے پیٹرولیم مصنوعات کی طلب و رسد اور پوری سپلائی چین کی باقاعدگی سے نگرانی کی جا رہی ہے۔

اجلاس میں وفاقی وزیر خزانہ و محصولات محمد اورنگزیب، وفاقی وزیر برائے اقتصادی امور احد چیمہ، وفاقی وزیر اطلاعات و نشریات عطا اللہ تارڑ، وزیر پیٹرولیم علی پرویز ملک، وفاقی وزیر آئی ٹی و ٹیلی کام شزہ فاطمہ، وزیر توانائی سردار اویس لغاری، وزیراعظم کے مشیر برائے نجکاری محمد علی، وزیر مملکت برائے خزانہ و ریلوے بلال اظہر کیانی، وزیراعظم کے معاون خصوصی طارق باجوہ اور دیگر اعلیٰ سرکاری حکام نے شرکت کی۔