عہدیدار کے مطابق ایران جنگ اسی وقت ختم کرے گا جب وہ خود مناسب سمجھے گا اور جب اس کی تمام شرائط پوری ہوں گی۔ انہوں نے کہا کہ تہران دفاعی کارروائیاں جاری رکھے گا اور اپنے مطالبات کی تکمیل تک دشمن کو بھاری نقصان پہنچاتا رہے گا۔

انہوں نے مزید کہا کہ امریکہ نے مختلف سفارتی ذرائع کے ذریعے مذاکرات کی کوشش کی، تاہم ایران ان تجاویز کو غیر حقیقی اور زمینی حقائق سے متصادم سمجھتا ہے۔ ان کا کہنا تھا کہ ماضی میں بھی مذاکرات کے بعد فوجی کارروائیاں کی گئیں، جس سے اعتماد مجروح ہوا۔

پریس ٹی وی کے مطابق ایران نے جنگ بندی کے لیے پانچ بنیادی شرائط پیش کی ہیں، جن میں دشمن کی جارحیت اور ٹارگٹ کلنگ کا مکمل خاتمہ، مستقبل میں جنگ نہ تھوپے جانے کی ضمانت، جنگی نقصانات کا واضح ازالہ، تمام محاذوں پر تنازع کا خاتمہ، اور آبنائے ہرمز پر ایران کی خودمختاری کو عالمی سطح پر تسلیم کرنا شامل ہے۔

ادھر پاکستان میں ایران کے سفیر رضا امیری مقدم نے ایرانی خبر رساں ادارے کو انٹرویو میں کہا کہ ایران ہمیشہ مذاکرات اور مسائل کے حل کا حامی رہا ہے، تاہم امریکہ کی جانب سے سفارت کاری میں دھوکے کے بعد ایران نے بھرپور دفاع کیا۔ انہوں نے کہا کہ ایران اور پاکستان کے درمیان علاقائی صورتحال پر قریبی مشاورت جاری ہے اور دونوں ممالک خطے میں امن و استحکام کے خواہاں ہیں۔

کاپی رائٹ بزنس ریکارڈر، 2026