فنانس ڈویژن کی جانب سے جاری پریس ریلیز میں بتایا گیا ہے کہ یہ بات اسلام آباد میں وزیرِ خزانہ محمد اورنگزیب کی زیر صدارت پیٹرولیم قیمتوں کی نگرانی سے متعلق اجلاس میں کہی گئی ہے۔

اجلاس میں قومی توانائی سپلائی کے منظرنامے کا جائزہ لیا گیا اور بتایا گیا کہ خام تیل اور ریفائنڈ پیٹرولیم مصنوعات کے ذخائر تسلی بخش سطح پر موجود ہیں۔

سپلائی چینز، امپورٹ ٹرمینلز سے لے کر ریفائنریز، اسٹوریج سہولیات اور ریٹیل آؤٹ لیٹس تک، معمول کے مطابق رواں دواں ہیں، جس سے ملک بھر میں بلا تعطل دستیابی یقینی بنائی جا رہی ہے۔

حکام کے مطابق سپلائی بفر کو مزید مضبوط بنانے کے لیے اضافی کھیپیں بھی منصوبہ بندی کے تحت ہیں، جبکہ ریفائنریز معمول کی پیداواری سطح پر کام جاری رکھے ہوئے ہیں اور بہتر ترین تھروپُٹ برقرار رکھنے کی کوششیں کی جا رہی ہیں۔

اجلاس میں عالمی تیل و گیس مارکیٹ کے رجحانات کا بھی جائزہ لیا گیا، جس میں قیمتوں میں اتار چڑھاؤ اور اس کے مقامی منڈیوں پر ممکنہ اثرات کو اجاگر کیا گیا۔ حکام بین الاقوامی اور مقامی قیمتوں کے درمیان فرق کا جائزہ لے رہے ہیں تاکہ بروقت پالیسی اقدامات کیے جا سکیں۔

شرکا نے توانائی کے پورے نظام میں آپریشنل تیاری برقرار رکھنے پر زور دیا اور ریفائنریز کو ہدایت کی کہ سپلائی کے استحکام کے لیے بہترین پیداواری سطح برقرار رکھی جائے۔

کمیٹی نے سپلائی کے ذرائع کو متنوع بنانے اور لاجسٹکس کو بہتر بنانے کے لیے حکومت سے حکومت کی سطح پر ہونے والے روابط کا بھی جائزہ لیا، جن میں اسٹوریج اور ٹرانس شپمنٹ انتظامات شامل ہیں۔

محمد اورنگزیب نے کہا کہ فعال منصوبہ بندی اور مربوط اقدامات کے باعث عالمی غیر یقینی صورتحال کے باوجود پاکستان توانائی کی سپلائی کو مستحکم رکھنے میں کامیاب رہا ہے، اور بین الاقوامی پیش رفت اور سپلائی کی صورتحال پر مسلسل نظر رکھنے کی ہدایت کی۔

انہوں نے دہرایا کہ پیٹرولیم مصنوعات کی بلا تعطل فراہمی یقینی بنانا حکومت کی اولین ترجیح ہے۔

اجلاس میں اعلیٰ حکام اور وزرا نے شرکت کی، جن میں وزیرِ توانائی سردار اویس احمد خان لغاری، وزیرِ قومی غذائی تحفظ رانا تنویر حسین، وزیرِ بحری امور محمد جنید انور چوہدری اور وزیرِ مملکت برائے خزانہ بلال اظہر کیانی شامل تھے۔