فضائی معیار کی نگرانی کرنے والے سوئس ادارے آئی کیو ایئر نے اپنی سالانہ رپورٹ میں بتایا ہے کہ گزشتہ برس 143 میں سے 130 ممالک اور خطے عالمی ادارہ صحت کے مقرر کردہ معیار پر پورا اترنے میں ناکام رہے۔ صرف 13 ممالک ایسے تھے جہاں آلودگی کی اوسط سطح 5 مائیکرو گرام فی مکعب میٹر سے کم رہی۔ آلودہ ترین ممالک کی فہرست میں پاکستان کے بعد بنگلہ دیش دوسرے اور تاجکستان تیسرے نمبر پر رہا۔

رپورٹ کے مطابق بھارت کا شہر لونی 2025 میں دنیا کا آلودہ ترین شہر قرار پایا، جس کے بعد چین کے علاقے سنکیانگ کا شہر ہوتن دوسرے نمبر پر رہا۔ دنیا کے 25 آلودہ ترین شہروں کا تعلق صرف بھارت، پاکستان اور چین سے ہے۔ مجموعی طور پر دنیا کے صرف 14 فیصد شہر عالمی معیار پر پورا اتر سکے، جبکہ کینیڈا کے جنگلات میں لگنے والی آگ کی وجہ سے امریکہ اور یورپ تک فضائی آلودگی میں اضافہ دیکھا گیا۔

تحقیق میں یہ بھی بتایا گیا کہ امریکہ کی جانب سے بجٹ کی کمی کے باعث اپنے سفارت خانوں سے آلودگی کا ڈیٹا جمع کرنے کا پروگرام بند کرنے سے کئی ممالک کا درست ڈیٹا حاصل کرنے میں مشکلات پیش آئیں۔ دوسری جانب لا نینا کے باعث ہونے والی بارشوں اور ہواؤں کی وجہ سے لاؤس، کمبوڈیا اور انڈونیشیا میں آلودگی کی سطح میں نمایاں کمی ریکارڈ کی گئی۔ آسٹریلیا، آئس لینڈ، ایسٹونیا اور پاناما ان ممالک میں شامل رہے جنہوں نے عالمی ادارہ صحت کے فضائی معیار کو برقرار رکھا۔