کمپنی نے کہا ہے کہ یہ رفتاریں ٹیسٹنگ کے دوران مسلسل ریکارڈ کی گئیں، اور اس کارکردگی کو اپگریڈ شدہ انفرااسٹرکچر اور نیٹ ورک آرکیٹیکچر میں بہتری سے منسوب کیا گیا ہے۔

بہتر ”آؤٹ پٹ ٹو اسپیکٹرم“ ایفیشنسی آپریٹرز کو محدود اسپیکٹرم وسائل کو بہتر استعمال کرتے ہوئے اعلیٰ ڈیٹا رفتار فراہم کرنے کی اجازت دے سکتی ہے، جو 5G خدمات کے تجارتی نفاذ کے لیے اہم پہلو ہے۔

اس ماہ کے آغاز میں پاکستان نے نیکسٹ جنریشن موبائل سروسز ( این جی ایم ایس ) اسپیکٹرم کی تاریخی نیلامی سے تقریباً 510 ملین ڈالر (تقریباً 142 ارب روپے) حاصل کیے، جبکہ ٹیلی کام ریگولیٹر نے آپریٹرز کی طرف سے حاصل کیے گئے اسپیکٹرم بلاکس کی درست پوزیشن کے تعین کے لیے پوزیشن اسائنمنٹ نیلامی بھی کامیابی کے ساتھ مکمل کی۔

ملک گیر 5 جی سروس کے آغاز کے لیے انفراسٹرکچر میں بھاری سرمایہ کاری کی ضرورت ہوگی، جس میں ہائی کیپیسٹی فائبر آپٹک کیبلز، اپگریڈ شدہ ٹاورز اور زیادہ گھنے نیٹ ورک گرڈز شامل ہیں، جبکہ ٹیلی کام آپریٹرز بھاری ٹیکسز اور ریگولیٹری بوجھ سے بھی نمٹ رہے ہیں۔

5 جی کو صرف محدود طبقے کے لیے پریمیئم سروس کے بجائے وسیع اقتصادی محرک بنانے کے لیے ملک میں شہری اور دیہی آبادی، اور جدید آلات تک رسائی رکھنے والوں اور نہ رکھنے والوں کے درمیان موجود ڈیجیٹل فرق کو کم کرتے ہوئے اسے قابل برداشت بنانا بھی ضروری ہے۔