وزیراعظم شہباز شریف کی زیر صدارت وزیراعظم ہاؤس اسلام آباد میں وفاقی وزارت ہاؤسنگ اینڈ ورکس کے امور پر اجلاس منعقد ہوا۔

اجلاس کا آگاہ کیا گیا کہ پبلک پرائیویٹ پارٹنرشپ کے تحت کم آمدنی والوں کے لیے گھروں کی تعمیر پر لائحہ عمل تیار کیا جا رہا ہے۔ رئیل اسٹیٹ اور ہاؤسنگ کے شعبوں کے ضابطہ کار کے حوالے سے ریئل اسٹیٹ ریگولیٹری اتھارٹی کا قیام عمل میں لایا جائے گا۔

اجلاس کے دوران وزیراعظم نے کہا کہ کم آمدنی والے طبقے کے لیے رہائش کی فراہمی، سستے گھروں کے منصوبے بشمول نجی شعبے کی حوصلہ افزائی اور عوامی سہولیات کی بہتری ہماری ترجیحات میں شامل ہیں۔

انہوں نے عام آدمی کو ہاؤس فنانس کی سہولت مؤثر انداز میں پہنچانے کے لیے عملی اقدامات اٹھانے کی ہدایت کی۔

اجلاس کو وزارت ہاؤسنگ اینڈ ورکس کے اسٹریٹجک روڈ میپ پر تفصیلی بریفنگ دی گئی۔ اجلاس میں بتایا گیا کہ تعمیراتی شعبے کے حوالے سے ٹیکس اسٹرکچر میں اصلاحات کی جارہی ہیں اور تعمیری شعبے کیلئے ٹیکس اسٹینڈرڈائزیشن پر فیڈرل بورڈ آف ریونیو اور صوبوں کی مشاورت جاری ہے۔

ہاؤس مورٹگیج کے حوالے سے اصلاحات کا مسودے پر بھی مشاورت جاری ہے۔

ہاؤس فنانس کے حوالے سے رئیل اسٹیٹ انویسٹمنٹ ٹرسٹ پر وزارت خزانہ، ایف بی آر، سیکیورٹیز اینڈ ایکسچینج کمیشن اور صوبائی وزارت ہاؤسنگ کے ساتھ مل کر کام کر رہے ہیں۔

اجلاس میں وفاقی وزیر قانون و انصاف اعظم نذیر تارڑ، وفاقی وزیر اقتصادی امور احد خان چیمہ، وفاقی وزیر خزانہ و محصولات محمد اورنگزیب، وفاقی وزیر ہاؤسنگ اینڈ ورکس ریاض پیرزادہ، وفاقی وزیر انفارمیشن ٹیکنالوجی و ٹیلی کام شزا فاطمہ، وزیراعظم کے مشیر برائے بین الصوبائی روابط رانا ثناء اللہ، وزیر مملکت برائے خزانہ و ریلوے بلال اظہر کیانی اور متعلقہ اعلیٰ سرکاری افسران نے شرکت کی۔